ރައީސުލްޖުމްހޫރިއްޔާކަމުގެ ހުވައި ކުރެއްވުމަށް ފަހު، ގަލޮޅު ދަނޑުގައި ތިބި އެތައް ހާސް ރައްޔިތުންނަކާއި، އަދި ޓީވީތަކުން ބަލަމުން ގެންދިޔަ އެތައް ހާސް ދިވެހި ރައްޔިތުންނަށް ރައީސް އިބްރާހިމް މުހައްމަދު ސޯލިހު ވައުދެއްވެވަޑައިގެންނެވެ. އެދުވަހު ރައީސް އިބްރާހީމް މުހައްމަދު ސޯލިހު ވިދާޅުވީ، އިންސާފުގެ މަގަށް ކަންކަން ގެންދިޔުމަށްޓަކައި ކުރަންޖެހިފައި އޮތް އެންމެ މުހިންމު އެއް މަސައްކަތަކީ، ދައުލަތުގެ އެކި މުއައްސަސާތަކުގައި އަށަގަނެ މޫލާފައިވާ ކޮރަޕްޝަނާއި ފަސާދައިގެ ޝަޤާފަތް ނައްތާލުން ކަމަށެވެ.

ރައީސްގެ ވާހަކަފުޅު ކިތައްމެ ފަށުއިވިޔަސް، މާދަމާ އަލިވިލޭނީ ދިވެހި ތާރީހުގައި ފުރަތަމަ ފަހަރަށް ކެބިނެޓުގެ ވަޒީރެއް ކޮރަޕްޝަނުގެ މައްސަލައިގައި ކޯޓަށް ހާޒިރުކުރާ ދުވަހުގެ ގޮތުގައެވެ. ކުޅިވަރު ވަޒީރު އަހްމަދު މަހްލޫފު މިއަދުވެސް އެ އިންނެވީ ކެބިނެޓުގައެވެ. މާދަމާ ކްރިމިނަލް ކޯޓަށް ހާޒިރުކުރަނީ ދިވެހި ތާރީހު ދުށް އެންމެ ބޮޑު ވައްކަންކަމުގައިވާ އެމްއެމްޕީއާރުސީގެ ހިޔާނާތުގެ މައްސަލައިގައެވެ. 

މާދަމާ ކްރިމިނަލް ކޯޓުގައި ފެށޭ ޝަރީޢަތަކީ، ކުޅިވަރު ވަޒީރު މަހްލޫފު، ރައްޔިތުންގެ މަޖިލީހުގެ މެންބަރުކަމުގައި ހުންނަވައިގެން، ކުރީގެ ނާއިބް ރައީސް އަހްމަދު އަދީބު އެމްއެމްޕީއާރުސީގެ ފައިސާ އިން 33،000 ޑޮލަރު (508،860ރ.) ރިޝްވަތުގެ ގޮތުގައި ހިފި ކަމުގެ ދައުވާ އެވެ. މާދަމާއަކީ އެމްޑީޕީ ސަރުކާރުގެ ލަދުވެތި ދުވަހެކެވެ. ލަދުވެތިކަން ބޮޑުވަނީ، އެމްޑީޕީގެ ބޮޑު މެޖޯރިޓީ އޮންނަ މަޖިލީހުން ނިންމި ނިންމުމާއި ގުޅިގެން އެންޓި ކޮރަޕްޝަން ކޮމިޝަން ވެސް މިއަދު ވުޖޫދުގައި ނެތުމުންނެވެ.