މިއަދު ހެނދުނު 11:00 އަށް ތާވަލް ކުރި މައްސަލަ ކްރިމިނަލް ކޯޓުން ކެންސަލް ކުރީ އިދާރީ މައްސަލައެއް ޖެހިގެން ކަމަށް ކްރިމިނަލް ކޯޓުގެ އޮފިޝަލަކު ވަނީ ވިދާޅުވެފައެވެ.
އެހެން ނަމަވެސް އެކަމުގެ ތަފްސީލެއް ކޯޓަކުން ހާމަ އެއް ނުކުރެއެވެ.
މަހުލުފްގެ މައްސަލަ އާއި ގުޅިގެން އޭސީސީއިން މީގެ ކުރިން ބުނެފައިވަނީ އެސްއީޒީ ބިލު ފާސްކުރުމަށް ވޯޓު ދިނުމަށް 27 އޮގަސްޓު 2014 ގައި މަހުލޫފު މަޖިލީހަށް ހާޒިރުވެފައިވަނީ މެލޭޝިއާއިން ސީދާ ވޯޓަށް ކަމަށާއި އެސްއޯއެފްގެ ޗެކަކުން މަހުލޫފުގެ އެކައުންޓަށް 33،000 ޑޮލަރު ޖަމާކޮށްފައިވާކަންވެސް ތަހުގީގަށް ހާމަވެފައިވާ ކަމަށެވެ.
މަހުލޫފުގެ އެކައުންޓަށް ޖަމާކޮށްފައިވާ 33،000 ޑޮލަަރަކީ ޑޮލަރު ގަނެވިއްކުމުގެ މުއާމަލާތެއްކަމަށް ބުނެ އެސްއޯއެެފްގެ ނަމުގައި ތަައްޔާރުކޮށްފައިވާ "ޕޭމެންޓް ރިސީވްޑް" ސްލިޕެއް މަހުލޫފު އޭސީސީއަށް ހުށަހަޅާފައިވާ ކަމަށާއި ނަމަވެސް، އެ ފައިސާއަކީ ޑޮލަރު ގަތުމުން ދިން ފައިސާކަން ތަހުގީގުން ބެލި ބެލުމުން އެނގެން ނެތް ކަމަށްވެސް އޭސީސީ އިން ވަނީ ބުނެފައެވެ.
މަހުލޫފް އަށް މިފައިސާ ދިނީ ރާއްޖޭގެ ކުރީގެ ނައިބު ރައީސް އަހުމަދު އަދީބު ކަމަށް ދައުލަތުން ވަނީ ތުހުމަތު ކޮށްފައެވެ.
މަހުލޫފްގެ މައްޗަށް ދައުލަތުން އުފުލާފައި ވަނީ، ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ (ހ)އާ ހަވާލާދީ އެ މާއްދާގެ (ށ)ގެ ދަށުން ރިޝްވަތު ހިފުމުގެ ދައުވާ އެވެ.
އެހެން ނަމަވެސް މިދައުވާތަކަށް މަހުލޫފް އިންކާރު ކުރެއެވެ.
