މިނިސްޓަރު ޝާހިދުގެ ދައުވަތަކަށް ރަސްމީ ދަތުރުފުޅެއްގައި ރާއްޖެ ވަޑައިގެންނެވި ތުރުކީވިލާތުގެ ޚާރިޖީ ވަޒީރު މެވްލޫތް ޝަވްޝަގްލޫއާއެކު މިއަދު ބޭއްވި ރަސްމީ މަޝްވަރާތަކަށްފަހު ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން މިނިސްޓަރު ޝާހިދު ވިދާޅުވީ، މިހާރުވެސް ދިވެހިންނަށް ތުރުކީވިލާތަށް ދަތުރުކުރުމަށް އީ-ވިސާ ނެގޭނެ އިންތިޒާމް ހަމަޖެހިފައިވާކަމަށާއި، އޭގެ ބަދަލުގައި ވިސާ-ފްރީ އެއްބަސްވުމެއް އެކުލަވާލުމަށް ތުރުކީވިލާތަށް ހުށަހެޅުއްވިކަމަށެވެ.
އަދި އެކަމަށް ތުރުކީވިލާތުގެ ސަރުކާރުން އެއްބަސްވެ، ވިސާ ނެތި ދިވެހިންނަށް ތުރުކީވިލާތަށް ދަތުރުކުރެވޭނެ އިންތިޒާމް ހަމަޖެހިގެންދާނެކަމަށް މިނިސްޓަރު ޝާހިދު ވިދާޅުވިއެވެ.
ތުރުކީއަކީ ދިވެހިންގެ މެދުގައި މަގުބޫލު މަންޒިލެކެވެ.
މިއަދު ދެ ޤައުމުގެ މެދުގައި 5 އެއްބަސްވުމެއްގައި ވަނީ ސޮއިކޮށްފައެވެ. އެއީ
- ވިޔަފާރީ ދާއިރާ އިތުރަށް ހަރުދަނާ ކުރުމާއި ގުޅޭ އެއްބަސްވުމެއް
- ސަގާފަތާއި ތަރިކަ އިތުރަށް ހިމާޔަތްކޮށް އެދާއިރާއިން ގުޅުން ބަދަހި ކުރުމުގެ އެއްބަސްވުމެއް
- ތިމާވެށީގެ ދާއިރާއިން ގުޅުން ބަދަހިކުރުން
- ދަނޑުވެރިކަމުގެ ސިނާއަތުން ގުޅުން ބަދަހިކުރުން
- ރާއްޖޭގެ ފޮރިން ސާވިސް އިންސްޓިޓިއުޓާއި، ތުރުކީގެ ޑިޕްލޮމަސީ އެކަޑަމީއާއިއެކު ގުޅުން ބަދަހިކޮށް ފޮރިން ސާވިސް ގެޑާއެއް ގާއިމުކުރުމާއި ގުޅޭގޮތުން ވެވޭ އެއްބަސްވުމެއް
ތުރުކީގެ ފޮރިން މިނިސްޓަރު ރާއްޖެއަށް ކުރައްވި މިދަތުރުފުޅަކީ ދިވެހިރާއްޖެއާއި ތުރުކީއާއި ސިޔާސީ ގުޅުން ގާއިމުކުރިފަހުން މިވީ 42 އަހަރުގެ ތެރޭގައި ތުރުކީގެ ފޮރިން މިނިސްޓަރެއް ރާއްޖެއަށް ކުރެއްވި ފުރަތަމަ ދަތުރުފުޅެވެ.
