އެބައްދަލުވުން ސިއްރުކޮށްފައިވަނީ ރިޕޯޓުގައި ހުރި ކަންކަން ތަންފީޒުކުރަމުން އަންނަ މިންވަރާ ގުޅޭ ގޮތުން މިދިޔަ ބުރާސްފަތި ދުވަހު ރައީސް އޮފީހުން މަޖިލީހަށް ފޮނުވި ސިޓީއަކީ ސިއްރު ސިޓީއެއްކަމަށް އެ ސިޓީގައި ބުނެފައިވާތީ ކަމަށް ބުނެއެވެ.
މިއަދުގެ 241 ކޮމިޓީގެ ބައްދަލުވުމުގައި އޮތީ އެ ސިޓީ ދިރާސާކޮށް، މަޝްވަރާ ކުރުމެވެ. އެ ކޮމިޓީގެ މުގައްރިރު، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ބައްދަލުވުމުގައި މިއަދު ވިދާޅުވީ ރައީސް އޮފީހުން ފޮނުވާފައިވާ ސިޓީގައި އެއީ ސިއްރު ސިޓީއެއް ކަމަށް ބަޔާންކޮށްފައިވާ ކަމަށެވެ.
އެހެންކަމުން ކޮމިޓީ ސިއްރުކުރަން ހުށަހެޅުއްވީ ކޮމިޓީގެ ނައިބު މުގައްރިރު، ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން)އެވެ. އެ ހުށަހެޅުން ކޮމިޓީގެ އިއްތިފާގުން ފާސްވެ ކޮމެޓީ ވަނީ ސިއްރުކޮށްފައެވެ.
މަޖިލީހުން އާއްމު ކޮށްފައިވާ އެރިޕޯޓަކީ ގައުމީ ސަލާމަތީ އިދާރާތަކާއި ކަމާއި ބެހޭ އެހެނިހެން އިދާރާތަކުގެ އިސްވެރިން ހާޒިރުކޮށްގެން މައުލޫމާތު ނަގައި އެމައުލޫމާތަށް ބިނާކޮށް އެކުލަވާލާފައިވާ ރިޕޯޓެކެވެ.
މަޖިލީހުގެ 241 ކޮމިޓީން މިދިޔަ އަހަރުގެ ޖުލައި މަހުގެ އަށް ވަނަދުވަހު ނެރުނު ގާތްގަނޑަކަށް 270 ސަފްހާގެ ރިޕޯޓުގައި ނަޝީދަށް ހަމަލާ ދިނުމުގެ ކުރިންނާއި ހަމަލާދިން ދުވަހު އަދި އޭގެ ފަހުން ކަން ހިނގާފައިވާ ގޮތުގެ ވަރަށް ތަފްސީލީ މައުލޫމާތު ހިމަނާފައިވާއިރު، ޑިފެންސް މިނިސްޓްރީން އެ މައްސަލާގައި ވެފައިވާ ބޮޑެތި އިހުމާލުތަކެއްގެ ވާހަކަ ވަނީ ފާހަގަކޮށްފައެވެ.
އެ އިންކުއަރީ ރިޕޯޓް ރައީސް އިބްރާހިމް މުހައްމަދު ސޯލިހް އާއި އުއްތަމަ ފަނޑިޔާރު މުހްތަސިމް އަދުނާނަށް އަށް އެރުވީ މިދިޔަ އަހަރުގެ ޖުލައި 11ވަނަ ދުވަހުއެވެ.
އެދުވަހު އެކަމަށްޓަކަައި ބޭއްވި ރަސްމިއްޔާތުގައި ވާހަކަަދައްކަވަމުން ރައީސް ވަނީ "ހެދިފައިވާ ގޯސްތައް" ކަމަށް އެ ރިޕޯޓްގައި ފާހަގަކުރި ކަންކަން ކުރިއަށް އޮތް ތަނުގައި އިސްލާހު ކުރައްވާނެ ކަމަށާއި، އެ ރިޕޯޓް ނޭޝަނަލް ސެކިއުރިޓީ ކައުންސިލަށް ހުށައަޅުއްވައި، ގައުމީ ސަލާމަތާއި ގުޅުންހުރި މުހިއްމު ކަންކަން ވީހާވެސް އަވަހަށް ހައްލުކުރައްވާނެކަމުގެ ޔަގީންކަން ދެއްވާ ފައެވެ.
ހައެއް މޭ ހަމަލާގެ ރިޕޯޓުގައި ވާ ކަންކަން ތަންފީޒުކުރަމުންދޭތޯ ބަލެމަށް 241 ކޮމެޓީން މިއަދު ބައްދަލުވުމެއް ބޭއްވިއިރު، ނަޝީދަށް އަމާޒުކޮށް ދިން ހަމަލާގެ ޝަރީއަތް ލަސް ކަމަށް ވިދާޅުވެ، މިމައްސަލައަށް ސަރުކާރުން އައްޔަން ކުރެއްވި މަންދޫބު އައްބާސް ފާއިޒު ކަންބޮޑުވުން ފާޅު ކުރައްވާފައެވެ.
އައްބާސް މިއަދު ކުރެއްވި ޓުވީޓުގައި ވިދާޅުވެފައިވަނީ އެތައް މަހެއް ނިމިގެން ދިޔައިރު ޝަރީއަތް ކުރިއަށް ގެންދެވިފައިވަނީ އެންމެ މީހެއްގެ ކަމަށެވެ. އަދި މައްސަލައިގައި ހިމެނޭ އެންމެންގެ ޝަރީއަތް ކުރިއަށް ނުދާތީ ވަނީ ކަންބޮޑުވާ ކަމަށްވެސް ވިދާޅުވެފައިވެއެވެ.
މިދިޔަ އަހަރުގެ މެއި މަހުގެ ހަވަނަ ދުވަހުގެ ރޭ ރައީސް ނަޝީދު އަވަހާރަ ކޮށްލަން ބޮން ގޮއްވާލުމުގައި އިސްކޮށް އުޅުނު އަދުހަމު އަހުމަދު ރަޝީދު 23 އަހަރަށް ޖަލަށް ލާން ވަނީ ހުކުމް ކޮށްފައެވެ. މިމައްސަލައިގައި ހުކުމް ކޮށްފައިވަނީ މީނާއަށް އެކަންޏެވެ.
އިއައްބާސް ފާއިޒަކީ މިމައްސަލައިގައި ، ތަހުގީގާއި، ކޯޓު މަރުހަލާތައް ކުރިއަށްދާގޮތް ގާތުން ބެލުމަށް ސަރުކާރުން އައްޔަން ކޮށްފައިވާ ބޭފުޅެކެވެ. މިމައްސަލައާ ގުޅޭ އެންމެހައި ކަންކަން އައްބާސް ބައްލަވާނެއެވެ. އަދި މިމައްސަލައާ ގުޅޭގޮތުން ކަމާގުޅޭ އިދާރާ ތަކަށް ލަފާވެސް ދެއްވާނެއެވެ
