ދައުލަތުގެ މާލިއްޔަތުގެ ގަވާއިދާ ހިލާފަށް އެ މިނިސްޓްރީން އަމަލުކޮށްފައިވާ މައްސަލަ ބަލާނީ "މާލިއްޔަތުގެ މައްސަލަ ބަލާ ކޮމިޓީ" އިންނެވެ. އަދި އިހުމާލުވާ މުވައްޒަފުންނަށް ފިޔަވަޅު އަޅާނީ އެ މިނިސްޓްރީގެ އެޗްއާރްއެމްޑީ ކޮމިޓީންނެވެ.
އޭޖީ އޮފީހުން އެ މިނިސްޓްރީއަށް އަންގާފައިވަނީ އެ މައްސަލަ ބެލުމަށާއި، ފިޔަވަޅު އެޅުމަށް އެ ކޮމިޓީތަކަށް ހުށަހެޅުމަށެވެ.
އޮޑިޓް ރިޕޯޓުގައި ގަވާއިދާއި ހިލާފަށް ޖެންޑަ މިނިސްޓްރީން އަމަލުކޮށްފައިވާކަމަށް ފާހަގަކޮށްފައިވާ ކަންކަން
- އެހީގެ ގޮތުގައި ލިބިފައިވާ ފައިސާ ދައުލަތުގެ މާލިއްޔަތުގެ ގަވައިދާ ޚިލާފަށް ބަލައިގަނެފައިވުމާއި އެ ފައިސާ ޚަރަދުކޮށްފައިވުން
އޭޖީން އާއްމުކުރި ޖެންޑަ މިނިސްޓްރީގެ 2020 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނެފައިވަނީ، ރާއްޖޭގައި ހިންގަމުން އަންނަ ޖަމިއްޔާއެއްގެ ފަރާތުން 2019 ވަނަ އަހަރުގެ ޑިސެންބަރުގައި ކުޑަކުދިންގެ ހިޔާއަށް ދިން 15,000 (ފަނަރަ ހާސް) ރުފިޔާގެ ފައިސާގެ އެހީއާއި މިނިސްޓްރީގެ ފަރާތުން ހަވާލުވެފައިވާއިރު، ފައިސާ ލިބުނުކަމުގެ ރަސީދެއް ތައްޔާރުކޮށްފައި ނުވާކަމާއި، އެފައިސާ ގަވާއިދާ އެއްގޮތަށް އޮފީހުގެ ހިސާބުތަކަށް ވައްދާފައި ނުވާކަމާއި، އެކައުންޓަށް ޖަމާކޮށްފައި ނުވާކަމަށް އެ އޮޑިޓް ރިޕޯޓުގައި ވެއެވެ. އަދި އޭގެ ހަމަސް ފަހުން އެ މިނިސްޓްރީގެ މުވައްޒަފެއްގެ އަމިއްލަ އެކައުންޓަކުން ޓްރާންސްފަ ކޮށް ތަކެތި ގަނެފައިވާ ކަމަށެވެ.
2. މާލީ ބަޔާންތައް އޮޑިޓު ކުރުމަށް ހުށަހަޅާފައި ނުވުން
މިނިސްޓްރީން ދައުލަތުގެ ބެލުމުގެ ދަށުގައި ތިބޭ ކުދިންނާއި އެކުދިން ތިބޭ މަރުކަޒުތަކަށް ހަދިޔާ ދިނުމާއި ބަލައިގަތުމާއި ބެހޭ އުސޫލުގައި ވާގޮތަށް، 2020 ވަނަ އަހަރަށް ރައްޔިތުންގެ މަޖިލީހުން އެ މިނިސްޓްރީ އަށް ފާސްކޮށްދިން ބަޖެޓުން ޚަރަދުކުރި ގޮތުގެ ހިސާބާއި، 2020 ވަނަ އަހަރު އެ މިނިސްޓްރީއަށް ލިބުނު އާމްދަނީ އާއި ހިނގި ޚަރަދުގެ ހިސާބުވެސް އޭޖީ އޮފީހަށް ހުށަހަޅާފައި ނުވެއެވެ.
އޮޑިޓް ރިޕޮޓުގައި ވާގޮތުން ކުޑަކުދިންގެ ހިޔާގައި ބަލަހައްޓާ ކުދިންގެ ކޮއްތު ހަމަޖެއްސުމަށްޓަކައި ނަގާ ފައިސާ އިން ގަންނަ ތަކެތީގެ ބިލްތައް ބަރާ ބަރަށް ހޯދައި ނަގުދު ފައިސާގެ ގޮތުގައި ނެގި ފައިސާ އާއި ބާކީހުރި ފައިސާ އެނގޭނެހެން ހިސާބު ބެލެހެއްޓުމަށް 2019ވަނަ އަހަރުވެސް އޭޖީ އޮފީހުން ޖެންޑަ މިނިސްޓްރީއަށް ލަފާދީފައިވެއެެވެ.
ދައުލަތުގެ މާލިއްޔަތުގެ ޤާނޫނުގައި ވާގޮތުން، ދައުލަތުގެ ކޮންމެ މަސްއޫލު އޮފީހެއްގައި، އެ ޤާނޫނުގެ ދަށުން ކަނޑައަޅައި ޒިންމާދާރުވެރިޔާ، ކޮންމެ މާލީ އަހަރެއް ނިމޭތާ ތިން މަސް ދުވަހަގެ ތެރޭގައި، އެ މާއްދާގައި ބަޔާންކުރާ މާލީ ހިސާބުތަކާއި އެ އޮފީހުން ހިންގި ކަންތައްތަކުގެ ރިޕޯޓް ހިމަނައިގެން، އަހަރީ ރިޕޯޓެއް ތައްޔާރުކޮށް އޮޑިޓަ ޖެނެރަލަށް ހުށަހަޅަން ޖެހެއެވެ. ނަމަވެސް އެ މިނިސްޓްރީން މިކަން 2020ވަނަ އަހަރުވެސް ކޮށްފައެއް ނުވެއެވެ.
3. ކޮވިޑް -19 އާއި ގުޅިގެން ހާލުގައި ޖެހުނު އާއިލާތަކަށް ކެއިން ބުއިމުގެ އިންތިޒާމް ހަމަޖެއްސުމުގައި ވެސް މާލިއްޔަތުގެ ގާނޫނާއި ހިލާފުވެފަވޭ
އެގޮތުން މަސައްކަތް ހަވާލުކުރާނެ ފަރާތެއް ހޮވުމުގައި ދައުލަތަށް އެންމެ ފައިދާހުރިގޮތަށް އަމަލުކޮށްފައިނުވާކަން ރިޕޯޓުގައި ފާހަގަކޮށްފަވެއެވެ.
4. ކެއިން ބުއިން ހަމަޖެއްސުމަށް ކޮށްފައިވާ ޚަރަދުތަކާގުޅޭ ލިޔެކިޔުންތައް ފުރިހަމައަށް ބަލަހައްާޓާފައި ނުވޭ
ކޮވިޑް-19 އާއި ގުޅިގެން ހާލުގައި ޖެހުނު އާއިލާތަކަށް ކެއިން ބުއިމުގެ ކަންތައް ހަމަޖެއްސުމަށް މިނިސްޓްރީން 28 އޭޕްރީލު 2020 ގައި ވެފައިވާ އެއްބަސްވުމުގައި، މިނިސްޓްރީން ކޮންމެ ދުވަހަކު ތަކެތި ބޭނުންވާ އަދަދު، އީމެއިލް މެދުވެރިކޮށް ނުވަތަ އެއްވެސް ރަސްމީ ލިޔުމަކުން އަންގާނެކަމަށް ބަޔާންކޮށްފައިވެއެވެ. ނަމަވެސް ރިޕޯޓުގައި ބުނެފައިވަނީ، ކެއުމަށް ދީފައިވާ އޯޑަރުތަކުގެ އަދަދުތަކާއި ފައިސާ ހޯދުމަށް ހުށަހަޅިފައިވާ ބިލުތަކުގައި ހުރި އަދަދުތައް ދިމާ ނުވާކަމަށެވެ.
5. އެޑްވާންސް ޕޭމަންޓް ގެރެންޓީ، ބިޑް ސެކިއުރިޓީ އަދި ޕަފޯމަންސް ގެރެންޓީ ނަގާފައިނުވުން
މާލިއްޔަތު ގަވާއިދުގައި މަސައްކަތްކޮށްދޭ ފަރާތަށް ނުވަތަ ޚިދުމަތް ފޯރުކޮށްދޭ ފަރާތަށް ނުވަތަ ތަކެތި ފޯރުކޮށްދޭ ފަރާތަށް އެޑްވާންސް ފައިސާ ދޭނަމަ، އެ ފަރާތަކުން އެ އެޑްވާންސް ޕޭމަންޓާ އެއްވަރުގެ ޕޭމަންޓް ގެރެންޓީއެއް ހޯދަންޖެހޭނެކަމަށް ބަޔާ ންކޮށްފައިވެއެވެ.
ނަމަވެސް، މިނިސްޓްރީން 2020 ވަނަ އަހަރުގައި ފިޔަވަތީގެ އެކަމަޑޭޝަން ބްލޮކްތަކުގެ އަލަމާރި ޖެހުމަށް 5،01،889( ފަސް ލައްކަ އެއްހާސް އަށް ސަތޭކަ އަށްޑިހަ ނުވަރުފިޔާ) އަށް ޙަވާލުކުރުމުގައި އެ ފަރާތަށް އެޑްވާންސް ޕޭމަންޓްގެ ގޮތުގައި 75،283(ހަތްދިހަ ފަސް ހާސް ދުއިސައްތަ އަށްޑިހަ ތިނެއް) ރުފިޔާ ދީފައިވަނީ އެޑްވާންސް ޕޭމަންޓް ގެރެންޓީއެއް ނުހޯދައެވެ.
އަދި ފިޔަވަތިން 2020 ވަނަ އަހަރުގައި ޖުމްލަ 8 ލައްކަ އެއްހާސް ދުއިސައްތަ ބާވީސް ރުފިޔާގެ ޚިދުމަތް ބިޑް ސެކިއުރިޓީ އަދި ޕަފޯމަންސް ގެރެންޓީ ނުނަގައި ހޯދާފައިވާ ކަން ރިޕޯޓްގައި ފާހަގަކޮށްފައިވެއެވެ. މިގޮތުން، ފިޔަވަތީގެ އެކަމަޑޭޝަން ބްލޮކްތަކުގެ އަލަމާރި ޖެހުމުގެ މަސައްކަތް ފަސް ލައްކަ އެއްހާސް އަށް ސަތޭކަ އަށްޑިހަ ނުވަ ރުފިޔާއަށް ޙަވާލުކޮށްފައިވަނީ ބިޑް ސެކިއުރިޓީ އަދި ޕަފޯމަންސް ގެރެންޓީއެއް ނުނަގައެވެ.
މީގެ އިތުރުން ފިޔަވަތީގެ ސްކޫލަށްދާ ކުދިންނަށް ބޭނުންވާ ޔުނީފޯމް، ބޫޓް އަދި ދަބަސް ފަދަ ތަކެތި ހޯދުމުގެ މަސައްކަތް 3،33,299 (ތިން ލައްކަ ތެއްތިރީސް ހާސް ދުއިސައްތަ ނުވަދިހަ ނުވަ ރުފިޔާ) އަށް ހަވާލުކޮށްފައިވަނީ ބިޑް ސެކިއުރިޓީ އަދި ޕަފޯމަންސް ގެރެންޓީއެއް ނުނަގައެވެ.
މީގެ އިތުރުންވެސް ބައިވަރު މައްސަލަތަކެއް އޮޑިޓުގައި ފާހަގަކޮށްފައިވެއެވެ.
