މިއަދު ކުރިއަށްދާ ރައްޔިތުންގެ މަޖިލީހުގެ ޖަލްސާގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ ނުހެދި ހުރި ރިސޯޓުތަކުގެ މައްސަލައަކީ ރަށްރަށުގެ ރައްޔިތުންގެ އިތުރުން ސަރުކާރުގެވެސް ވަރަށް ބޮޑު ގޮންޖެހުމެއް ކަމަށެވެ. އެހެންވެ ސަރުކާރުން މިހާރު އެރަށްރަށާ މެދު އަމަލު ކުރާނެ ގޮތެއް ވަނީ ނިންމާފައެވެ.
ގައްދޫ ދާއިރާގެ މެންބަރު އަހުމަދު ޒާހިރު ކުރެއްވި ސުވާލަކަށް ޖަވާބު ދެއްވަމުން، ޑރ. މައުސޫމް ވިދާޅުވީ އެރަށްތައް ހަދަން ހަވާލުވި ފަރާތްތަކާއެކު މިހާރު އެއްބަސްވުންތައް ހަދަމުން ގެންދާ ކަމަށާއި މިހާރު ހަދަން ހަވާލު ކޮށްފައިވާ 75 ރިސޯޓަކާއެކު އެއްބަސްވުން ހަދައި ނިންމާފައިވާ ކަމަށެވެ.
ޓޫރިޒަމް މިނިސްޓްރީން އެއްބަސްވުންތައް ހަދަމުންދަނީ ތިންއަހަރުތެރޭ ރިސޯޓުތައް ނިންމަން ޝަރުތު ކޮށްފައެވެ. އެހެންނަމަވެސް މިނިސްޓްރު ވިދާޅުވީ ދޮޅުއަހަރުތެރޭ މަސައްކަތް ނުފެށިއްޖެނަމަ އެއްބަސްވުން ބާތިލް ކުރުމުގެ ބާރު މިނިސްޓްރީއަށް ލިބިގެންވާ ކަމަށެވެ.
ސީދާ ތިންއަހަރުން ނުނިންމައިފިނަމަ އޮޓޮމެޓިކުން އެގްރިމެންޓް ބާތިލްވާގޮތަށް ލިޔެވި އެގޮތަށް، އެއްބަސްވެ އެގްރިމެންޓް ކުރެވެމުންދާ ކަމަށް ޑރ މައުސޫމް ވިދާޅުވިއެވެ.
މިއަހަރަކީ ރާއްޖޭގެ ޓޫރިޒަމް ސިނާއަތަށް 50 އަހަރު ފުރޭ އަހަރެވެ. 50 އަހަރު ފުރޭނީ މިއަހަރުގެ އޮކްޓޫބަރު 3 ގައެވެ.
