ކާނާ ވިހަވުމަށް މެދުވެރިވާ 3 ވައްތަރެއްގެ ޖަރާސީމު އުޅެއެވެ. އެއީ، ސްޓެފައިލޮކޮކަސް، ބޮޗޫލިޒަމް އަދި ސަލްމޮނެއްލާ ޓައިފިމިޔުރިއަމް އެވެ. އިސްވެ ބުނި ފަދައިން ނުބާވެފައި ހުންނަ ކާއެޗެއް ނުވަތަ ތިމާއާއި ނުގުޅޭ އެއްޗެއް ކެވުމުން، މި ޖަރާސީމުތައް ތިމާގެ ހަށިގަނޑު ތެރޭގައި ފެތުރިގަނެއެވެ.
މިކަމުގެ އަލާމާތް ތަކުގެ ތެރޭގައި ކުއްލިއަކަށް މޭނުބައި ކުރުން، ހޮޑުލެވުން، ބޭރަށް ހިންގުން އަދި ބަނޑުގައި ގަދައަށް ރިއްސުން ހިމެނެއެވެ. އަދި ބައެއް ފަހަރު، ލޮލުގެ މަސްތަކުގެ ބާރުނެތި ލޮލުގެ ފެނުމަށް ބަދަލުއައުން، އަވަރުވުން، އަނގަހިކުން، ކާތަކެތި ދިރުވަން އުދަގޫވުން، އަޑުފޮށި ބެދުން، ޝޮކުޖެހުން އަދި ހިތްހުއްޓުން ފަދަ ކަންތައްތައް ހިމެނެއެވެ.
ކާނާ ވިހަވުމުގެ އަލާމާތްތަށް އާއްމު ގޮތެއްގައި ތިމާގެ ހަށިގަނޑުން ފެންނަން ފަށާނީ، އެ ކާއެއްޗެއް ކާތާ 8 ގަޑި އިރާއި 24 ގަޑިއިރާއި ދެމެދުގައެވެ. އިސްވެ ގެނެސްފައިވާ އަލާމާތްތަށް މި ވަގުތު ތަކުގެ ތެރޭގައި ފެންނަން ފަށާފިނަމަ، ލަސްނުކޮށް އެކަމަށް ސަމާލުކަން ދިނުމަކީ، ވަރަށް މުހިއްމު ކަމެކެވެ. އަދި ވަކިން ހާއްސަކޮށް، މާ ގިނައިން ބޭރަށް ހިންގާނަމަ، ލަސްނުކޮށް ސިއްހީ މާހިރެއްގެ އެހީ ހޯދުމަކީ، ވަރަށް މުހިއްމު ކަމެކެވެ. ސަބަބަކީ، މާ ގިނައިން ބޭރަށް ހިންގުމަކީ، ތިމާގެ ފުރާނައަށްވެސް ނުރައްކާވާފަދަ ކަމަކަށް ވުމުންނެވެ.
ކާނާ ވިހަވުމުން ގޭގައި ދެވިދާނެ ބައެއް ފަރުވާތައް ހުރެއެވެ. އަދި މިކަންތައް އަވަހަށް ކޮށްފިނަމަ ޑޮކްޓަރަކަށް ނުދައްކާ ފަރުޖެހޭނެ ކަމަށް ސިއްހީ މާހިރުން ވަނީ ބުނެފައެވެ. އެގޮތުން ކާނާ ވިހަވާހެން ހީވާނަމަ އަވަހަށް ދޮންކެޔޮ ވަކެއް ކާލާށެވެ. ސަބަބަކީ، ދޮންކެޔޮ ވަކުގައި ހުންނަ މާއްދާތަކުން، ކާނާ ވިހަވުމަށް މެދުވެރިވާ ޖަރާސީމުތަކާއި، ދެކޮޅަށް ހަރަކާތްތެރި ވާން ފަށައެވެ.
ދިރި އަކީވެސް ކާނާ ވިހަވެއްޖެނަމަ ބޭނުން ކުރަން ވަރަށް ރަނގަޅު އެއްޗެކެވެ. އެގޮތުން ލުނބޯ ފަނިތައްޓަކަށް ދިރި އެޅުމަށްފަހު ދުވާލު 3 އިރު ބުއިމުން، ކާނާ ވިހަވުމުން އިސާހިތަކު މީހާ ފަސޭހަ ކޮށްދެއެވެ. ޔޯގަޓް ތައްޓެއް ކާނާ ވިހަވެއްޖެނަމަ ކާލުމަކީ ސިއްހީ މާހިރުންގެ ފަރާތުން އިރުޝާދު ލިބިފައިވާ ކަމެކެވެ. އެހެން ކަމުން، ޔޯގަޓު ތައްޓެއް ކާލުމުން، އިސާހިތަކު އެ އުނދަގޫތަކުން މީހާ ފަސޭހަ ކޮށްދެއެވެ.
އެހެން ނަމަވެސް ކާނާ ވިހަވެ، ހާލަތު ގޯސްވާނަމަ އެންމެ އެދެވިގެން ވަނީ، ލަސްނުކޮށް ޑޮކްޓަރަކަށް ދެއްކުމެވެ. އެހެނީ، ބައެއް ފަހަރު ކާނާ ވިހަވުމުގެ ސަބަބުން ދިމާވާ ކަންކަމީ، މީހާގެ ފުރާނައަށް ނުރައްކާ ކޮށްފާނެ ކަމެކެވެ.
