ދިގު ރަށު ސިއްހީމަރުކަޒު މެނޭޖާ މުހައްމަދު ޝިރުހާން "ސީއެންއެމް" އަށް ވިދާޅުވީ ރަށުގައި އެންބިއުލާންސެއް ނެތި ދުވަސްތައް ފާއިތު ވެފައިވާތީ އެކަމުގެ ކަންބޮޑުވުން ރައްޔިތުންގެ ފަރާތުންނާއި ސިއްހީމަރުކަޒުގެ ފަރާތުން އެބައޮތް ކަމަށެވެ.
އެންބިއުލާންސެއް ނުލިބި ގާތްގަޑަކަށް ތިން މަސް ފާއިތު ވެފައި ވާއިރު، މިނިސްޓްރީއަށް ގުޅައިގެން އެތައް ފަހަރަކު އެދިފައިވާނެ ކަމަށާއި، އަދި މިހާރު ލިއުމުން ވެސް ވެސް އެދިފައިވާނެ ކަމަށް އޭނާ ވިދާޅުވިއެވެ.
އެގޮތަށް ބޭނުން ކުރަމުން ދަނީ އެކި ފަރާތްތަކުގެ މުދާ އުފުލާ ޕިކަޕް ކަމަށާއި، ގުޅައިގެން ޕިކަޕް ހޯދާއިރު އާންމުންގެ އެހީތެރިކަން ލިބުނު ނަމަވެސް އެއީ އެހާފަސޭހަ ކަމެއް ނޫން ކަމަށް އޭނާ ވިދާޅުވިއެވެ. އެރަށަކީ ރަށުގެ އާބާދީ އަށްވުރެ މީހުން ރަށުގައި ދިރިއުޅޭ އާބާދީ ގިނަ ރަށެކެވެ. އަދި ފަތުރުވެރިން ވެސް ގިނައިން ޒިޔާރަތް ކުރާ ރަށެކެވެ.
އެރަށު ކައުންސިލް ރައީސް އިބްރާހިމް އުސްމާން ވެސް މީގެ މަހެއްހާ ކުރިން "ސީއެންއެމް" އަށް ވިދާޅުވެފައި ވަނީ އެރަށުގައި ސިއްހީ ހިދުމަތް ވެސް ދަށް ކަމަށެވެ. އެމްބިއުލާންސެއް ނެތި ދުވަސްތައް ފާއިތު ވެފައި ވާއިރު، ކުނި އުފުލަން ކައުންސިލަށް ގެންގޮސް ފައި އޮތް ރަށު ޕިކަޕުގައި ބަލި މީހުން އޭރު އުފުލި ކަމަށް އޭނާ ވިދާޅުވިއެވެ.
އެ ރަށް ދަނީ ފަތުރުވެރި ކަމާއެކު ކުރިއަރަމުން ކަމަށާއި، ހުރިހާ ދިމާލަކަށް ބެލިޔަސް އެކަން ދަނީ ފެންނަމުން ކަމަށާއި، ނަމަވެސް ފަތުރުވެރިކަން ކުރިއަރަމުންދާ ސްޕީޑުގައި އެހެން ހިދުމަތްތައް ސަރުކާރަކުން ނުލިބޭ ކަމަށް އޭނާ ވިދާޅުވިއެވެ.
