އެމްޑީިޕީގައި މިހާރު ކަންކަން ހިނގަމުންދާ ގޮތާއި ގުޅޭ ގޮތުން “ސީއެންއެމްް”އާއި ވާހަކަދައްކަވަމުން އިބްރާ ވިދާޅުވީ ޕާޓީތެރެއިން މިއަދު މި ފެންނަ ކަންތައްތަކަކީ ''އަންނި'' ބޭނުންހައި ގޮތަކަށް އެމްޑީޕީ ހިންގަން މަސައްކަތް ކުރައްވާތީ ވާހައި ކަންތައްތައް ކަމަށެވެ.
އެމްޑީޕީގެ ޗެއާޕާސަން ހޮވުމުގެ އިންތިހާބުގެ ކެމްޕޭން ފެށުނު ފަހުން ރައީސް ނަޝީދަށް ސަޕޯޓުކުރައްވާ މެންބަރުންނާއި, ރައީސް އިބްރާހިމް މުހައްމަދު ސޯލިހަށް ސަޕޯޓުކުރައްވާ މެންބަރުންގެ މެދުގައި އަންނަނީ ބަހުގެ ހަމަލާތައް ރައްދުކުރަމުންނެވެ. އެ އިންތިހާބުގައި ރައީސް ނަޝީދުގެ ފަޅިން ވާދަކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީއެވެ. ރައީސް ސޯލިހު ފަޅިން ހުންނެވީ އެ މަނިކުފާނުގެ އެންމެ އަރިސް ވަޒީރު އަދި އިބްރާގެ ކޮއްކޮ ފައްޔާޒް އިސްމާއީލެވެ.
އެއީ އެމްޑީޕީތެރޭގައި ނޭނގި ހުރި ވަރަށް ގިނަ ކަންތައްތަކެއް އާންމު މެންބަރުންނާއި ހަމައަށް ތިލަވެގެން ގޮސްފައި ހުރުމުން ކަމަށާއި, އެހެންކަމުން މި ފަހަރުގެ އިންތިހާބުގައި މެންބަރުން ވޯޓުދޭނީ ޕާޓީ ރަނގަޅަށް ގެންދެވޭނެ މީހަކަށްކަމަށް ގަބޫލުކުރައްވާކަމަށް ވެސް އިބްރާ ވިދާޅުވިއެވެ.
އަދި މުހިންމީ މެންބަރުންގެ އަދަދު އިތުރުވުމެއްނޫން ކަމަށާއި, ތިބޭ ބަޔަކު އުސޫލުތަކާއި ހަމަތަކަށް އަމަލުކުރުންކަމަށް ވެސް އިބްރާ ވިދާޅުވިއެވެ.
