އެމްޑީޕީގެ ޗެއާޕާސަންކަމަށް ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) އަށް ތާއީދު ހޯދުމުގެ ގޮތުން ބ.ތުޅާދޫގައި ރޭ ބޭއްވި ކަންމަތީ ޖަލްސާގައި އީވާ ވިދާޅުވީ ވަޒީރަށް ވޯޓު ނުދީފިނަމަ ތަރައްގީގެ މަޝްރޫއުތައް ހުއްޓޭނެކަމަށް ގަބޫލު ކުރުމަކީ ކޮސްކަމެއް ކަމަށެވެ.
އީވާ އެހެން އެ ވިދާޅުވަނީ ޗެއާޕާސަންކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއީލްގެ ކެމްޕޭން ޓީމުން ރަށްރަށަށް ގޮސް އެފަދަ ވާހަކަތައް ދައްކާކަމަށް އެ ރަށްރަށުގެ ރައްޔިތުން ބުނަމުންދާތީ އެކަމަށް އިޝާރަތް ކުރައްވައެވެ.
އީވާ ވިދާޅުވީ ހަޔާތުގައި ފުންކޮށް ވިސްނާލަންޖެހޭ ބައެއް ކަންކަން އެބަހުރި ކަމަށާއި, އެއްބައި ކަންކަން ކުރިމަތިވާއިރަށް ހިތާހިތުން ހަދަންވީ ގޮތް އެނގޭ ކަމަށެވެ. އެ ގޮތުން އިންތި ޗެއާޕާސަންކަމަށް ކުރިމަތިލެއްވުމަކީ ހަދަންވީ ގޮތް އެނގޭ އަދި ސުވާލު އުފެދޭކަމެއް ނޫންކަމަށް ވެސް އީވާ ވިދާޅުވިއެވެ.
މިއަދާ ހަމައަށް ސިޔާސީ ހަޔާތް ހޭދަކުރެއްވީ އިންތިއާއެކުކަން ފާހަގަކުރައްވައި އީވާ ވިދާޅުވީ އިންތިގެ ދެ ގޮތެއް ނުވާ އަޒުމާއި, އިންތި އެމްޑީޕީގެ އަސާސްތަކުގަ ހިފައިގެން އެ ހުންނަ ހުރުމާއި ތެދުވެރިކަމުގެ އިތުރުން އިންތިއަކީ މީހުންނަށް ނުހަނު އިހްތިރާމުކުރައްވާ ބޭފުޅެއް ކަމަށެވެ.
އީވާ ވިދާޅުވީ ''ތީއީ ސަރުކާރު މީހުންނެއް ނޫނޭ'', ތިއީ ''އިދިކޮޅު މީހެކޭ'' މިހާރު ރައްޔިތުން މަޖިލީހުގެ އެމްޑީޕީގެ ބައެއް މެންބަރުން އިންތިއާއި ދިމާއަށް އެބަ ބުނާ ކަމަށެވެ. ނަމަވެސް އިންތިއާ އަދި ދެން ތިބި އެހެން މީހުން އެތައް ބޮޑު އަނިޔާއަކާ ކުރިމަތިލައި, އެތައް ގުރުބާނީއެއް ނުވިނަމަ މިއަދު މި ސަރުކާރު އޮންނާނެތޯ އީވާ ސުވާލު ކުރެއްވިއެވެ.
އީވާ ވިދާޅުވީ އެ ބޭފުޅުން އިދިކޮޅު މިވަނީ ވަކި ކަންތައްތަކަކާއި ކަމަށާއި އެއީ ވައްކަމާއި ކޮރަޕްޝަނާއި, އެތެރޭގެ އިންތިހާބަކާއި ދިމާކޮށް ނުފޫޒު ފޯރުވައި ބިރުދައްކާތީ ކަމަށެވެ.
