ރައީސް އޮފީހުން ބުނީ، އީއީއީޕީގެ ދަށުން ކުރިޔަށްގެންދާ ސިލްސިލާ ލެކްޗަރތަކާއި، ތަމްރީނު ޕްރޮގްރާމްތަކުގެ ދަށުން، މިނިސްޓްރީ އޮފް ފޮރިން އެފެއާޒްގެ އެހީތެރިކަމާއެކު، ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އާ ގުޅިގެން "ވިޝަނިންގ ފޮރ މޯލްޑިވްސް ލީޑަރޝިޕް ޑައިލޮގްސް" ގެ ނަމުގައި ސިލްސިލާ ވެބިނާ ޕްރޮގްރާމެއް މިހާރު ވަނީ ފަށާފައި ކަމަށެވެ.
މި ސިލްސިލާގެ ފުރަތަމަ ސެޝަން 23 މާރިޗު 2022 ވަނަ ދުވަހު ބާއްވާފައިވާއިރު،. ޒޫމް މެދުވެރިކޮށް ކުރިޔަށް ގެންދިޔަ ފުރަތަމަ ސެޝަންގެ މަޢުޟޫއަކީ "ލީޑިންގް ތްރޫ އަންސާޓިނިޓީ: ސްޓްރެޓީޖިކް ފޯސައިޓް" ކަމަށް ރައީސް އޮފީހުން ބުނެއެވެ.
މި ސެޝަންތައް ކުރިޔަށްގެންދަނީ ސަރުކާރުގެ މުއައްސަސާތަކުގެ އިސް މަގާމުތަކަށް ޢައްޔަންކުރައްވާފައިވާ ފަރާތްތަކާއި، އެ މުއައްސަސާތަކުގައި މަސައްކަތްކުރައްވާ ސިވިލް ސަރވިސްގެ މުވައްޒަފުންނާއި، ދައުލަތުގެ މުއައްސަސާތަކާއި، ކުންފުނިތަކާއި، ސިޓީ ކައުންސިލްތަކާއި، އަތޮޅު ކައުންސިލްތަކާއި، ރީޖަނަލް ހޮސްޕިޓަލުތައް ހިމެނޭގޮތަށް 280 އަށްވުރެ ގިނަ ބައިވެރިންނާއެކުގައި ކަމަށްވެސް ރައީސް އޮފީހުން ބުނެއެވެ.
ރައީސް އޮފީހުން ބުނީ، މި ވެބީނާ ފައްޓަވައިދެއްވުމުގެ ގޮތުންމިނިސްޓާ އޮފް ނޭޝަނަލް ޕްލޭނިންގް، ހައުސިންގ އެންޑް އިންފްރާސްޓްރަކްޗާ، މުޙައްމަދު އަސްލަމް ވާހަކަފުޅު ދެއްކެވިއިރު، މި ވެބިނާ ފެސިލިޓޭޓް ކޮށްދެއްވީ ޔޫއެންޑީޕީން ކަނޑައެޅުއްވި ކަމާބެހޭ ދާއިރާގެ ފަންނީ މާހިރުންކަމުގައިވާ މިސް އަރްތީ ކްރިޝްނަން، ސްޓްރެޓީޖިކް އެޑްވައިޒާ އޮން ފޯސައިޓް، ޔޫއެންޑީޕީ އޭޝިޔާ އެންޑް ޕެސިފިކް އަދި މިސްޓާ ލެއިތް ވެރެމައިޓޯ، ޑައިރެކްޓާ، ޑިޕާޓްމަންޓް އޮފް ލޯކަލް އޮތޯރިޓީސް، މިނިސްޓްރީ އޮފް އިންޓަރނަލް އެފެއާޒް، ރިޕަބްލިކް އޮފް ވަނުވާޓޫއެވެ. ވެބިނަރގެ މަޝްވަރާ ސެޝަން މޮޑަރޭޓް ކުރެއްވީ ރާއްޖޭގައި ހުންނަވާ ޔޫ.އެން.ޑީ.ޕީގެ ރެސިޑެންޓް ރެޕްރެޒެންޓޭޓިވް މިސްޓަރ އެންރިކޯ ގަވެގްލިއާ ކަމަށެވެ.
އެގްޒެކެޓިވް އެންހާންސްމަންޓް އެންޑް އެންރިޗްމަންޓް ޕްރޮގްރާމަކީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު، 27 ޑިސެންބަރު 2021 ވަނަ ދުވަހު އިފްތިތާހްކޮށްދެއްވާއިވާ ޕްރޮގްރާމަކަށްވާއިރު، މި ޕްރޮގްރާމް ކުރިޔަށް ގެންދިޔުމަށް ސަރުކާރުގެ އެކި މުއައްސަސާތަކުން ދެއްވާ އެއްބާރުލެއްވުމާއި، އެހީތެރިކަން ރައީސް އޮފީހުން ވަނީ ފާހަގަކޮށްފައެވެ.
