ދެކުނުގެ ސަރަހައްދު ތަކަށް މަސްވެރިކަން ރަނގަޅުވުމުން އިއްޔެއާއި ޖެހެންދެން ކޫއްޑޫއިން ދުވާލަކު 800 ޓަނުގެ މަސް ކިރަމުން އައިކަން ފާހަގަ ކޮށްލެވެއެވެ. އެހެން ނަމަވެސް ގިނަ ދޯނި ތަކަކަށް މަސްކިރުމަށް ފުރުސަތު ދިނުމުގެ ގޮތުން ކޫއްޑޫއިން ވަނީ ދޯންޏަކުން ފަސް ޓަނުގެ މަސް ގަތުމަށް ނިންމާފައެވެ.
ކޫއްޑޫއިން މިގޮތަށް ނިންމުމާއި ގުޅިގެން ގިނަ މަސްވެރިންތަކެއް އަންނަނީ އެކަމާއި މެދު ހިތްހަމަ ނުޖެހުން ފަޅުކުރަމުންނެވެ. އަދި މިއީ މިހާ މަސްވެރިކަން ރަނގަޅު ދުވަސްވަރެއްގައި ކޮށްގެން ވާނެ ކަމެއް ނޫން ކަމަށާއި، އަގު ކުޑަ ކުރުމަށްފަހު ގަންނަ ގޮތަށް ނަމަވެސް ހެދުމަށް ބައެއް މަސްވެރިން އަންނަނީ ގޮވާލަމުންނެވެ.
"ސީއެންއެމް" އާއި ވާހަކަ ދެއްކި ގދ. މަޑަވެލީ މަސް ދޯންޏެއްގެ ކައްޕިއަކު ބުނީ، އެ ދޯނިން ތިން ދުވަސްތެރޭ 32 ޓަނުގެ މަސް ބާނައިގެން ކޫއްޑޫއަށް ކިރުވަން ދިއުމުން ކޫއްޑޫއިން ނެގީ އެންމެ ފަސް ޓަނުގެ މަސް ކަމަށާއި، މިކަމުގެ ސަބަބުން ބޮޑެތި ގެއްލުންތަކެއް ވެފައި ވާކަމަށެވެ. އަދި މިއީ މިފަދަ މަހެއްގައި ކުރަން ހެޔޮވާވަރުގެ ކަމެއް ނޫން ކަމަށްވެސް ކައްޕި ބުންޏެވެ.
މިކަމާއި ގުޅިގެން ގިނަ މަސްވެރިންނެއް އަންނަނީ ނުރުހުން ފާޅުކޮށް ސަރުކާރުން މިކަމަށް ކޮންމެސް ހައްލެއް ހޯދައިދޭން ގޮވާލަމުންނެވެ. އަދި ގިނައިން މަސްބޭނޭ ދުވަސްވަރެއްގައި އެމަހަށް އެކަށީގެންވާ ފައިސާ ނުލިބުމަކީ ހިތާމަ ކުރާ ކަމެއް ކަމަށެވެ.
