މެޓު އޮފީހުން މިއަދު އާއްމުކޮށްފައިވާ ފަސް ސަރަހައްދެއްގެ މެޓް އޮފީހުގެ ސްޓޭޝަންތަކުގެ ރެކޯޑުތަކުން ދައްކާގޮތުގައި ފިނިހޫނުމިން އެންމެ މައްޗަށް އެރީ ހުޅުލެ އަށެވެ. އެއީ 33.5 ޑިގްރީ ސެލްސިއަށެވެ. ހުޅުލެއަށް އިހުސާސްވި ފިނިހޫނު މިން ހުރީ 43.3 ޑިގްރީ ސެލްސިއަަސްގަ އެވެ.
ހަނިމާދޫގެ ފިނިހޫނުމިން 32 ޑިގްރީ ސެލްސިއަސް އެރިއިރު އިހުސާސް ކުރެވޭ ފިނިހޫނުމިން ހުރީ 41.9 ޑިގްރީ ސެލްސިއަސްގަ އެވެ.
ދެކުނުގެ ކައްދޫ، ކާޑެއްދޫ އަދި ގަމަށް ފިނިހޫނުމިން ހުރީ 31-32 ޑިގްރީ ސެލްސިއަސްގަ އެވެ. އިހުސާސްކުރެވުނު ފިނިހޫނުމިން އެސަރަހައްދުތަކުގައި ހުރީ 38-39 ޑިގްރީ ސެލްސިއަސްގަ އެވެ.
އޭޕްރީލް މަހަކީ އަހަރުގެ ތެރޭގައި މުޅި ރާއްޖެއަށް އެންމެ ހޫނުގަދަ މަހެވެ. މެޓުން ބުނީ މިދުވަސްވަރު ވައި މަޑުވުމާއި، އޭގެ ސަބަބުން ވައިގެ ތެއްކަން މަތިކޮށް ހިފެހެއްޓިފައިހުރުމުން ވައިގެ ހޫނުމިނަށް ވުރެއް އިހުސާސްކުރެވޭ ހޫނުމިން އެތައްގުނައެއް މަތިވާ ކަމަށެވެ. އަދި މިއީ އިރުވައި މޫސުމުން ހުޅަނގު މޫސުމަށް ބަދަލުވާ ދުވަސްވަރުވެސްމެއެވެ.
