އެއިދާރާއިން ނެރެފައިވާ ބަޔާނެއްގައި ބުނެފައިވަނީ، އެގައުމުގެ އެކި ހިސާބުތަކުގެ ހޫނު މިން މިހާރުވެސް ހުރީ 42 ޑިގްރީ އާއި 46 ޑިގްރީއާއި ދެމެދުގެ މިންވަރެއްގައި ކަމަށާއި، މިއަށްވުރެ ބޮޑަށް އަދިވެސް އެގައުމުގެ ހޫނުމިން މައްޗަށް އަރާނެ ކަމަށް ލަފާ ކުރެވޭ ކަމަށެވެ.
އެއިދާރާއިން ހޫނުމިން މައްޗަށް ދާނެ ކަމުގެ އިންޒާރު ދީފައި ވާއިރު، އެގައުމުގެ މަހާރާޝްޓްރާ ސްޓޭޓުން މިހާރުވެސް 25 މީހުން ވަނީ ހޫނު ގަދަވުމުގެ ސަބަބުން މަރުވެފައެވެ. އަދި އެތައް ބަޔަކަށް ހޫނު ގަދަވުމުގެ ސަބަބުން ހޮސްޕިޓަލު ތަކުގައި ފަރުވާ ދެމުން އަންނަ ކަމަށްވެސް އެގައުމުގެ ނޫސްތަކުގައި ވަނީ ބުނެފައެވެ.
އެގައުމުގެ ސިއްހީ އިދާރާއިން ބުނެފައިވަނީ، ގިނަ ބަޔަކު ހޫނު ގަދަވެ މަރުވަމުން ދަނީ "ހީޓް ސްޓްރޯކް" ޖެހުމުގެ ސަބަބުން ކަމަށެވެ. އެހެން ކަމުން ހުރިހާ ފަރާތްތަކުންވެސް މިކަމަށް ހާއްސަ ސަމާލުކަމެއް ދިނުމަށް ސިއްހީ އިދާރާއިން ވަނީ ބުނެފައެވެ.
އިންޑިއާގެ ހޫނުމިން މައްޗަށް ގޮސްފައި ވާއިރު، އެގައުމުގެ ފަގީރު ހިސާބުތަކުގައި ދިރިއުޅެމުން އަންނަ ފަރާތްތަކަށް މިކަމުގެ އަސަރު އަންނަނީ ވަރަށް ބޮޑަށް ކުރަމުންނެވެ. ސަބަބަކީ އެހިސާބުތަކަށް މި ދުވަސްކޮޅު ދޭތެރެ ދޭތެރެއިން ކަރަންޓު ކެނޑުމުގެ މައްސަލަ ތަކާއި ދިމާވަމުން ދިއުމެވެ.
އެހިސާބު ގަނޑުގެ އޮފިޝަލުން އަންނަނީ މަގުމައްޗަށް ފެން ޖެހުމާއި، ބޮޑެތި ގަނޑުފެން ގަނޑުތައް މަގުމައްޗަށް ނެރި އާއްމުންނަށް ބޭނުން ކުރެވޭނެ ގޮތް ހަދަމުންނެވެ.
