އެތައް ބައެއްގެ އެތައް މިލިއަން ރުފިޔާއަކަށް ޚިޔާނާތްތެރިވެ، އެ ކުންފުނީގެ ވެރިޔާ އަހްމަދު މޫސާ ފިލައިގެން ރާއްޖޭން ބޭރުގައި އުޅެނިކޮށް ރާއްޖެ ގެނައި އިންޓަރޕޯލް މެދުވެރިކޮށް ރެޑް ނޯޓިސް ނެރެގެންނެވެ. މި ދައްކަނީ އެތައް ބައެއްގެ މުޅި ދިރިއުޅުގައި ރައްކާކުރި އެތައް ފައިސާއަކަށް ޚިޔާނަތްތެރިވެގެން އުޅޭ މީހެއްގެ ވާހަކައެވެ.
ޚިޔާނާތުގެ ގިނަ ދައުވާތަކެއް އުފުލާފައިވަނިކޮށް އޭނާ ދޫކޮށްލި ފަހުން ދެ މަހެއްހާ ދުވަސްވަނީއެވެ. އޭނާ ހިފެހެއްޓޭނެ ގޮތެއް ރާއްޖޭގެ ޖުޑީޝަލް ސިސްޓަމްގެ ތެރޭގައި އޮތް ކަމަކަށް ނުވިއޭ ބުނެވިދާނެއެވެ.
އެތައް ބައެއްގެ އެތައް ހައްޤަކާ ގުޅިފައިވާ މިކަމުގައި ކޮޅެއް މެދެއް ފެންނާނެބާއެވެ؟ ފްލެޓް އަޅައިދޭނެ ކަމަށް ބުނެ ގިނަ ބައެއްގެ އަތުން ފައިސާ ނެގި މައްސަލާގައި ހައްޔަރުކޮށްފައި ހުއްޓާ ކްރިމިނަލް ކޯޓުން އޭނާ ތިން ވަނަ ފަހަރަށް ދޫކޮށްލީއެވެ. ދޫކޮށްލުމާއެކު ޕްރޮސިކިއުޓަރ ޖެނެރަލް އޭނާ ގޮވައިގެން ހައިކޯޓަށް ދެއެވެ.
ދެން ހަމަ އެއް ކޯޓުން އަނެއް ކޯޓުން މިއީ ކޮން ސަކަރާތެއް ހެއްޔެވެ؟ މިއީ ޔަގީނުންވެސް އިންސާފެއް ނޫނެވެ. އާދިއްތަ ދުވަހު ހައިކޯޓުގައި ބާއްވަން އުޅުނު މައްސަލައަކީ ސުޕްރީމް ކޯޓުން ކުރި އަމުރަކަށް ބާއްވަން އުޅުނުނ މައްސަލައެވެ. އެކަމަކު އާދިއްތަ ދުވަހު ކެންސަލްވީއެވެ. ހޯމަ ދުވަހަށް އަނެއްކާވެސް ތާވަލުކޮށްފައި އެބައޮތެވެ. ސާޅީސް އަށް ގަޑި އިރު ގުނާނެ ގޮތަކާ މެދު ޕީޖީއާ ކޯޓުތަކަށް އެއް ގަލަކަށް ނޭރި، ހައިކޯޓާ ސުޕްރީމް ކޯޓުގެ ފަނޑިޔާރުން އެތައް ރައުޔެއް ނެރެ ގާނޫނުތައް މާނަ ކުރަމުންދަނީއެވެ. އައްމަޓީ މިނިވަންކަމާއެކު މަގުމަތީގައެވެ.
