"ސީއެންއެމް" އަށް މައުލޫމާތު ލިބިފައިވާގޮތުގައި ޅ.އޮޅުވެލިފުއްޓާއި ދިމާލު ބޭރުގައި އެ ދޯނި މަސްވެރިކަން ކުރަމުންދަނިކޮށް މި ހާދިސާ ހިނގިއިރު އެވަގުތު ދޯނީގައި 14 ފަޅުވެރިން ތިއްބެވެ. ކަނޑަށް ވެއްޓުނު ވަގުތު މިޔަރު ހަމަލާދީފައިވަނީ އުމުރުން 62 އަހަރުގެ ޅ. ނައިފަރަށް ނިސްބަތްވާ ދިވެހި ފިރިހެނަކަށެވެ. 

އެމްއެންޑީއެފުން ބުނީ، އެވަގުތު އެމީހާއަށް މިޔަރެއް ހަމަލާ ދިނުމުން، އިތުރު ފަރުވާދިނުމަށް ޅ.އަތޮޅު ހޮސްޕިޓަލަށް ގެންދިއުމުގައި އެމްއެންޑީއެފް ނޮދަން އޭރިޔާ ކޯސްޓްގާޑް ސްކޮޑްރަންއިން އެހީތެރިކަން ފޯރުކޮށްދީފައިވާނެ ކަމަށާއި ހާދިސާގެ މައުލޫމާތު ލިބުނީ މިއަދު ހެނދުނު 10:57 ހާއިރު ކަމަށެވެ.

ޅ. އަތޮޅު ހޮސްޕިޓަލުގެ މީޑިއާ އޮފިސަރު އުމަރު "ސީއެންއެމް" އަށް ވިދާޅުވީ، އެ ހޮސްޕިޓަލަށް ގެނެވުނީ  މީގެ ކުޑައިރުކޮޅެއް ކުރިން ގަޑިން މެންދުރު 13:35 ހާއިރު ކަމަށެެވެ. ގެނައި ގޮތަށް ފަރުވާއަށް އޮޕަރޭޝަން ތިއޭޓަރަށް ވައްދާ ފަރުވާ ފަށާފައިވާ ކަމަށް ވިދާޅުވިއެވެ. 

މިޔަރު ދަތް އެޅުމުން ޒަހަމުވެފައިވަނީ ފައި ނަމަވެސް ހޮސްޕިޓަލަށް ގެނައިއިރުވެސް ފޮތިގަނޑަކުން ބަދެފައިވާތީ ލިބިފައިވަނީ ކިހާ ވަރެއްގެ ޒަހަމެއްކަމެއް އޭނާއަށް އަދި ސާފުނުވާކަމަށް އޭނާ ވިދާޅުވިއެވެ. ނަމަވެސް ޒަހަމުވެގެން ގެނައި މީހާގެ ހާލަތު ރަނގަޅު ކަމަށް ވިދާޅުވިއެވެ. އަދި އިތުރު ޒަހަމެއް ލިބިފައި ނުވާކަމަށް ވިދާޅުވިއެވެ. 

ބައެއް މަސްތައްވެސް ދޯންޏަށް ނަގާއިރު ހުންނަނީ ދެބައިކުޅަ އެއްބައި ކާލާފައި

މިފަދަ ހާދިސާއެއް ހިނގާފައި މިވަނީ މިޔަރު ގިނަވެ އެކަމުގެ ސަބަބުން މަސްވެރިންނަށް ގިނަ ތަކުލީފުތަކެއް ޖެހޭ ކަމުގެ ޝަކުވާ މަސްވެރިން ކުރަމުންދާ ދަނޑިވަޅެއްގައެވެ. ބައެއް މަސްވެރިން ބުނާ ގޮތުގައި ބާނާ މަސް ދޯންޏަށް ނަގާއިރު ވެސް އޭގެ ދެބައިކުޅަ އެއްބައި މިޔަރު ކާލާފައި ހުރެއެވެ.