ސާއިލްގެ މަންމަ މަރިޔަމް އަގީލާ މިރޭ ސީއެމްއެމްއަށް ބުނީ އަދިވެސް ތެޅިތަންތަން ހުރީ ކަޅުކޮށް ކަމަށާއި، އޭނާގެ ގައިން އަދިވެސް ތަދު ނުކެނޑޭ ކަމަށެވެ.
މިދިޔަ ބުދަދުވަހު ހިނގި މިހާދިސާގައި ، ސާއިލްއަށް އަނިޔާ ކުރުމާ ގުޅިގެން ޑޮކްޓަރަށް ދެއްކުމުން ޑޮކްޓަރު ކަންބޮޑުވި ކަމަށާއި، ޑޮކްޓަރު ދީފައިވާ ބޭސްތައް ދިނުމުން މިހާރު ރަނގަޅު ވަމުން އަންނަ ކަމަށެވެ.
މިމައްސަލައާ ގުޅިގެން މިރޭ ޖެންޑާ މިނިސްޓްރީން އެރަށުގައި އުފައްދާފައިވާ "އިބަމަ" ކޮމިޓީގެ ބައްދަލު ވުމެއް ވަނީ ބާއްވާފައެވެ. ކައުންސިލުން ބުނީ އެމައްސަލަ ބެލުމަށްޓަކައި މާދަމާ ޖެންޑާ މިނިސްޓްރީގެ ޓީމެއް އެރަށަށް ދާގޮތަށް މިހާރު ހަމަޖެހިފައިވާ ކަމަށެވެ.
ސާއިލްއަށް އަނިޔާ ކޮށްފައިވަނީ ބުދަދުވަހު، ފުނަދޫއާއި މިލަންދޫ ބައްދަލު ކުރި ފުޓްބޯޅަ މެޗެއް ބެލުމަށް ސާއިލް އެސަރަހައްދަށް ގޮސް އުޅެނިކޮށް ކުދިންތަކެއް އައިސް އޭނާ ވަލަށް ވެއްދުމަށްފަހުއެވެ.
ސާއިލްއާ ހަވާލާދީ މަންމަ އަގީލާ ބުނީ ވަލަށް ވެއްދުމަށް ފަހު ތަޅަންފެށީ ކަމަށެވެ.
