ކުއްލިއަކަށް ހާލުދެރަވި މި މީހާ ނިޔާވެފައިވަނީ ރޭ ފ. ނިލަންދޫއިން ފުރައިގެން މާލެ ގެނައުމުގެ މަގުމަތީގައި ކަނޑުމަތިންނެވެ. 

ނިޔާވެފައިވަނީ ނިލަންދޫ ނަރުގިސްވިލާ އިސްމާއީލް ނަސީރު ނަމަކަށް ކިޔާ ދެބައި އުމުރުގެ (ސީދާ އުމުރު އަދި ސާފެެއް ނުވޭ) މީހެކެވެ.

މި ހާދިސާއާއި ބެހޭގޮތުން ސީއެންއެމްއަށް މައުލޫމާތުދެއްވަމުން ފ.އަތޮޅު ހޮސްޕިޓަލްގެ މެނޭޖަރ އިބްރާހިމް ޙަލީލް މިއަދު ވިދާޅުވީ ބަލިމީހެއްގެ ހާލަތު ސީރިއަސްވުމާޢި ގުޅިގެން އެ ހޮސްޕިޓަލަށް ގެނައިކަމުގެ މައުލޫމާތު ލިބިފައިވަނީ އިއްޔެ ހަވީރު 17:30 ހާއިރު ކަމަށެވެ. 

ޙަލީލް ވިދާޅުވީ ބަލިމީހާގެ ހާލަތު ސީރިއަސް ހާލަތުގައި އޮތުމުން ވަގުތުން އެ ހޮސްޕިޓަލުގެ ޑޮކްޓަރުންނާއި ނަރުހުން މަަސައްކަތް ފަށާފައިވާ ކަމަށެވެ. އަދި ވިދާޅުވީ ބަލިމީހާ އަވަސް ފަރުވާއަށް މާލެ ފުރުވާލުމަށް އާސަންދައިގެ ހުރިހާ ކަމެއް 18:30 ހާއިރު ނިންމާފައިވާ ކަމަށެވެ. 

މިފަދަ އެމެޖެންސީ ހާލަތްތަކުގައި އައިޖީއެމްއެޗްގެ ޑޮކްޓަރުންގެ ލަފާ ހޯއްދަވައިގެން އިތުރު ފަރުވާ ހޯއްދަވާކަން ފާހަގަކުރައްވަމުން ޙަލީލް ވިދާޅުވީ ހޮސްޕިޓަލުގެ ޑޮކްޓަރުންގެ ޓީމުން ފުރިހަމަ ކުރަންޖެހޭ ހުރިހާ ލިޔުންތަކެއް ފުރިހަމަ ކުރުމަށްފަހު ބަލިމީހާ ފުރުވާލުމަށް 20:30 ގައި ތައްޔާރުކޮށްފައިވާ ކަމަށެވެ. 

ޙަލީލް ވިދާޅުވީ ބަލިމީހާ ފުރުވާލާފައިވަނީ ރޭ ދ.ކުޑަހުވަދޫއިން ސީއެމްބިއުލައިންސް އެއް ގެނެސްގެން ރޭ 20:53 ހާޢިރު ކަމަށެވެ. 

ނަސީރު ނިޔާވެފައިވަނީ ރޭ 11:15 ހާއިރު އެވެ. “ސީއެންއެމް”އަށް މައުލޫމާތު ލިބިފައިވާ ގޮތުގައި ނަސީރު ނިޔާވެފައިވަނީ ހާޓް އެޓޭކެއް ޖެހިގެންނެވެ.