މިއަދު އޮތް ރައްޔިތުންގެ މަޖިލޫހުގެ ޖަލްސާގައި ވާހަކަ ޕްލޭނިން މިނިސްޓަރު މުހައްމަދޔު އަސްލަމްއާ ކުރެއްވި ސުވާލުގައި އޭނާ ވިދާޅުވީ ކުޅުދުއްފުއްޓަކީ ރާއްޖޭގައި މިހާރު އެންމެ ޑިމާންޑް ބޮޑު އެއާޕޯޓު ކަމަށާއި، އޭގެ އިތުރުން ކޮންމެ ދުވަހަކުހެން ބަލިމީހުން މާލެއަށް ވެސް ގެންނަ އެއާޕޯޓެއް ކަމަށެވެ.
މިނިސްޓަރު އަސްލަމް ވިދާޅުވީ ކުޅުދުއްފުށީ އެއާޕޯޓު ހަލާކުވެފައިވަނީ އެ އެއާޕޯޓު ހެދުމުގައި އިހުމާލު ވެފައިވާތީ ކަމަށާއި، އެކަން ހައްލު ކުރުމަށް އެމްޓީސީސީއާއެކު މިހާރު މަސައްކަތް ކުރައްވޗަމުން ގެންދަވާ ކަމަށެވެ.
ކުޅުދުއްފުށީ އެއާޕޯޓު
ކުޅުދުއްފުށީ އުތުރު ދާއިރާގެ ކައުންސިލަރު މުހައްމަދު ދާއޫދު ވިދާޅުވީ މިހާރު އެ އެއާޕޯޓުގެ ފެންސްގެ ބޮޑު ބައެއް އައރިއަޅާލާފައިވާކަމަށާއި، ގިރަމުން ގިރަމުން އައިސް ތާރުގަނޑާ ހަމައަށް އައިސްފި ނަމަ ބޭނުން ނުކުރެވޭ ހާލަތަށް އައިސްދާނެ ކަމަށެވެ.
"ބޭނުން ނުކުރެވޭ ހާލަތަށް އައިސްދާނެ ތާރުގަނޑާ ހަމައަށް އައިސްފިނަމަ. އެޖކަމަކު މިހާރު އެމްޓީސީސީން މަސައްކަތް ކުރައްވަމުން ދަނީ" ދާއޫދު ވިދާޅުވިއެވެ.
ކައުންސިލުން ބުނީ އެމައްސަލަ މިހާރު ދިމާވަމުން އަންނަނީ ކުރިން އެއާޕޯޓް ހެދި އިރު އީއައިއޭ ރިޕޯޓުގައި އޮތް ގޮތާ ހިލާފަށް ބޮޑު ހިލައިގެ ބަދަލުގައި ކުދި ހިލަތަކެއް ޖަހައިގެން މަސައްކަތް ކޮށްފައިވާތީއެވެ. ކައުންސިލުން ބުނީ އީއައިއޭ ރިޕޯޓުގައި އޮތްގޮތުން ނަމަ ޖަހަންޖެހެނީ ބޮޑު ހިލައެވެ.
