ފަނޑިޔާރުންނަށް ސަރުކާރުން ދޫކުރި ފްލެޓްތަކެއް ހާއްސަ އަގުތަކެއްގައި ބައްލަވައިގަނެފައި ވާކަމަށް އަދި އެކަމުގެ ބަދަލެއްގެ ގޮތުން ހައިކޯޓުގެ ގަޒިއްޔާއެއްގެ ހުކުމް ކުރުމަށް ނިންމިކަމަށް ތުހުމަތުކޮށް ޖޭއެސްސީއަށް ހުށަހެޅުނު މައްސަލައެއް ބެލުމަށްފަހު، ފަނޑިޔާރު އަބުދުއްރައޫފް އަދި ފަނޑިޔާރު އަބްދުﷲ އެ ފްލެޓުތަކާއި ހަވާލުވުމަކީ ޤާނޫނު އަސާސީއާ ހިލާފު އަމަލެއްކަމަށް ކަނޑައަޅާ ފަނޑިޔާރުކަމުން ވަކި ކުރަން ނިންމައި މަޖިލީހަށް ހުށަހެޅަން ނިންމާފައިވަނީ މިދިޔަ އެޕްރީލު މަހުގެ 20 ވަނަ ދުވަހުގެ ރޭ ބޭއްވުނު، އެ ކޮމިޝަނުގެ ބައްދަލުވުމެއްގައެވެ.
ޖޭއެސްސީން މަޖިލީހަށް ފޮނުވި އެ ހުށަހެޅުން ދިރާސާކުރުމަށް މިދިޔަ އެޕްރީލް މަހު އެކޮމެޓީން ބޭއްވި ބައްދަލުވުމުގައި ކޮމެޓީގެ ނައިބު މުގައްރިރު، ފޮނަދޫ ދާއިރާގެ މެމްބަރު މޫސާ ސިރާޖް ވިދާޅުވީ، އެމައްސަލަ ދިރާސާ ކުރިއިރު ދެފަނޑިޔާރުންގެ ފަރާތުން ފޮނުވާފައިވާ ސިޓީއާއި، ޖޭއެސްސީގެ ރިޕޯޓުވެސް ބަލާފައިވާނެ ކަމަށެވެ. އޭގެ ތެރެއިން ފާހަގަވި ދެކަމެއް އެބައޮތް ކަމަށާއި އެކަން ސާފުކުރަން ބޭނުންވާ ކަމަށް ސިރާޖް ވިދާޅުވިއެވެ.
އެހެންކަމުން ހަތަރު ސުވާލެއް އުފައްދަވާ އެކަންކަން ސާފުކުރަން ޖޭއެސްސީއަށް ސިޓީއަކުން ދެންނެވުމަށް އޭނާ ހުށަހެޅުއްވިއެވެ. އެ ހުށަހެޅުން އެދުވަހުގެ ކޮމެޓީގެ އިއްތިފާގުން ފާސްވެފައިވާތީ، އެ ސުވާލުތަކަށް ޖަވާބުދާރީވެ، ޖޭއެސްސީން ކޮމެޓީއަށް ފޮނުވި ލިއުންތައް އިއްޔެއާއި މިއަދު ކޮމެޓީގައި ވަނީ ދިރާސާކޮށްފައެވެ.
އެ ލިއުންތައް ދިރާސާކުރުމަށްފަހު މިއަދު އެ ކޮމެޓީގެ އިއްތިފާގުން ނިންމީ ޖޭއެސްސީގެ ނިންމުން ގޯސް ކަމަަށާއި، ދެ ފަނޑިޔާރުންގެ މައްސަލަ އަލުން ބެލުމަށް ޖޭއެސްސީއަށް އެންގުމަށެވެ. އެމައްސަލާގައި ދެފަނޑިޔާރުން ވަކިކުރުމުގައި އިޖްރާއީ އަދުލުވެރިކަން ގާއިމުވެފައި ނުވާ ކަމަށް ނިންމާ ކޮމެޓީން ފާހަގަކުރި ކަންކަމުގެ ތެރޭގައި ބަލަންވީ ކަންކަން ނުބެލުމާއި، ފަނޑިޔާރުންނަށް ފައިނަލް ރިޕޯޓަށް ޖަވާބުދާރީވުމުގެ ފުރުސަތު ނުދީ އޮތްކަން ފާހަގަކުރިއެވެ.
ފަނޑިޔާރުން ވަކިކުރަން ނިންމި ނިންމުމުގައި ޖޭއެސްސީ ގޯސްތައް ހަދާފައިވާ ކަމަށް ބުނެ، ދެ ފަނޑިޔާރުންގެ ފަރާތުން ކޮމެޓީއަށް ފޮނުވި ސިޓީއަށް ރިއާޔަތްކޮށް ސުވާލު އުފެދޭ ކަންކަން ހުރުމުން ކޮމެޓީން ސާފުކުރަން ބޭނުންވެގެން ޖޭއެސްސީގައި ހަތަރު ސުވާލެއް ކޮށްފައިވެއެވެ. މިއަދާއި އިއްޔެ ކޮމެޓީން ދިރާސާކުރީ އެކަމަށް ލިއުމުން އެ ކޮމިޝަނުން ފޮނުވި ޖަވާބުތަކެވެ.
ކޮމެޓީން ޖޭއެސްސީއާއި ކުރިމަތިކޮށްފައިވާ ސުވާލުތައް
- މިމައްސަލަ ދިރާސާކުރިއިރު، ފަނޑިޔާރުން ކޮމެޓީއަށް ފޮނުވާފައިވާ ސިޓީގައި ފާހަގަކޮށްފައިވާ ކަންކަމާއި ގުޅިގެން ކޮމެޓީން ސާފުކުރަން ބޭނުންވެގެން ޖޭއެސްސީއަށް ހަތަރު ސުވާލެއް ހުށަހަޅާފައިވެއެވެ.
- ސްލޫކީ މައްސަލަ ތަހުގީގުކުރުމަށް އުފެއްދި ތަހުގީގު ކޮމެޓީގެ އިއްތިފާގުން މައްސަލަ ސާބިތުނުވާ ކަމަށް ނިންމި މައްސަލައެއް، ފަހުން އެ ކޮމެޓީއަށް ބަދަލުގެނެވި މުޅި ނިންމުން ބަދަލުވެފައިވަނީ ކީއްވެތޯ؟
ސިރާޖް ވިދާޅުވީ، ސްލޫކީ މައްސަލަ ތަހުގީގުކުރުމަށް ފުރަތަމަ އެކުލަވާލި ތިން މެމްބަރެއްގެ މައްޗަށް އެކުލެވޭ ކޮމެޓީން ތައްޔާރުކުރި ރިޕޯޓުގައި ފާހަގަކޮށްފައިވަނީ އެއްވެސް ސްލޫކީ މައްސަލައެއްް ނެތްކަމާއި، އެއްވެސް ފިޔަވަޅެއް އަޅަން ނުފެންނަ ކަމަށް ކަމަށެވެ.
އެގޮތަށް ނިންމާފައިވަނިކޮށް ކޮމެޓީގެ މެމްބަރަކު އިސްތިއުފާދިނުމުން ފަހުން އެކުލަވާލެވުނު ކޮމެޓީގެ ރިޕޯޓުގައި މުޅި ނިންމުން ބަދަލުވެފައިވާކަން ސިރާޖް ފާހަގަކުރެއްވިއެވެ. އެ ރިޕޯޓުގައި ނިންމާފައި ވަނީ ސްލޫކީ މައްސަލައެއް އޮތްކަމަށެވެ. އަދި ފިޔަވަޅު އަޅަން ނިންމާފައި އޮތްނަމަވެސް ވަކިކުރަން ނިންމާފައި ނުވާކަމަށް ސިރާޖް ވިދާޅުވިއެވެ.
- ފަހުން އެކުލަވާލެވުނު ތަހުގީގު ކޮމެޓީގެ ރިޕޯޓަށް ޖަވާބުދާރީވުމުގެ ފުރުސަތު ފަނޑިޔާރުންނަށް ދެވިފައިވޭތޯ؟ ދެވިފައިވާނަމަ އެކަމުގެ ތަފްސީލެއް ކޮމެޓީއާއި ހިއްސާކުރަން
ދެވަނަ ކަމަކަށް ސިރާޖް ވިދާޅުވީ، ފަހުން އެކުލަވާލި ސްލޫކީ ކޮމެޓީގެ ރިޕޯޓަށް ޖަވާބުދާރީވުމުގެ ފުރުސަތު ނުދޭކަމަށް ދެފަނޑިޔާރުން ޖުޑިޝަރީ ކޮމެޓީއަށް ފޮނުވި ސިޓީގައި ފާހަގަކޮށްފައިވާ ކަމަށެވެ. އެއީ ޖޭއެސްސީގެ ގަވާއިދާ ހިލާފު ކަމެއްކަން ފާހަގަކޮށް ސިރާޖް ވިދާޅުވީ، ފަނޑިޔާރަކާއިމެދު އަޅާ ފިޔަވަޅެއް ނިންމަންވާނީ ތަހުގީގު ރިޕޯޓުގައި ފާހަގަކޮށްފައިވާ ކަންކަމަށް މައްސަލަ ރައްދުވާ ފަނޑިޔާރަށް ޖަވާބުދާރީވުމުގެ ފުރުސަތުދީފައި ކަމަށް ގާނޫނުގައި ބަޔާން ކުރާ ކަމަށެވެ.
- މިގޮތަށް ފްލެޓް ލިބިފައިވާ އެއްވެސް މީހަކު މީގެ ކުރިން ޝަރަފުވެރިކަމާއިއެކު ރިޓަޔަކުރަން ފުރުސަތު ދެއްވާފައިވާނެތޯ؟ ދެވިފައިވާނަމަ ދެ ފަނޑިޔާރުން ވަކިކުރަން ނިންމި ނިންމުމުގައި އެކަމަށް ރިއާޔަތް ނުކުރީ ކީއްވެތޯ؟
ތިންވަނަ ކަމެއްގެ ގޮތުގައި ސިރާޖް ފާހަގަކުރެއްވީ، މީގެ ކުރިން ހަމަ އެގޮތަށް ފްލެޓު ލިބިފައިވާ ފަނޑިޔާރުންނަށް ޝަރަފުވެރިކަމާއިއެކު ރިޓަޔަކުރުމުގެ ފުރުސަތު ޖޭއެސްސީން ދީފައިވާކަމަށްވެސް ފަނޑިޔާރުން ފާހަގަކުރާ ކަމަށެވެ. އެހެންކަމުން އެއްމަސަލައެއްގައި ދެގޮތަކަށް ނިންމަންޖެހުނު ސަބަބެއް ސާފުކުރުމަށްވެސް އޭނާ ހުށަހެޅުއްވިއެވެ.
- މިހާރު އޮތް ޖޭއެސްސީން ވެސް ފަނޑިޔާރުންނަށް ފްލެޓުދިނުމަށް މަޝްވަރާތަކެއް ކުރިކަމަށް މައުލޫމާތު ލިބޭތީ އެކަން ހިނގައިދިޔަތޯ އެކަން ހިނގައިދިޔައީ ކިހިނެތްތޯ؟
އެންމެ ފަހު ކަމެއްގެ ގޮތުގައި ސިރާޖް ފާހަގަކުރައްވާފައިވަނީ މިހާރު އޮތް ޖޭއެސްސީންވެސް ފަނޑިޔާރުންނަށް ފްލެޓުދޭން ވާހަކަތަކެއް ދައްކާފައިވާކަމުގެ ޝަކުވާތަކެއް ކޮމެޓީއަށް ލިބިފައިވާ ކަމަށެވެ.
