"ސީއެންއެމް" އަށް މިއަދު ދެއްވި އިންޓަރވިއުއެއްގައި ނިލަންދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސާ ނަސީބާ އަލީ ވިދާޅުވީ ކޮމެޓީއަށް ދިމާވާ އެންމެ ބޮޑު ގޮންޖެހުމަކީ ކޮމެޓީން ކުރަމުންގެންދާ މަސައްކަތްތައް ކުރުމަށް ހާއްސަ އޮފީހެއް ގާއިމުކުރެވިފައި ނެތުމުން ކަމަށެވެ.
އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކަކީ އަންހެނުން ބާރުވެރި ކުރުމަށާއި އަންހެނުންގެ މަސައްކަތްތައް ހަރުދަނާ އުސޫލުން ކުރިއަށްގެންދިއުމަށް މި ސަރުކާރުގެ ވައުދުގެ ތެރެއިން ހިމަނައިގެން ރައްޔިތުންގެ މެދުގައި ނަގާ ވޯޓަކުން އިންތިހާބު ކުރާ ކޮމެޓީ އެކެވެ.
ނަސީބާ ވިދާޅުވީ އަންހެނުންގެ ކޮމެޓީގެ މަސައްކަތްތައް ކުރުމަށް ހާއްސަ ތަނެއް މިހާތަނަށްވެސް ގާއިމުކުރެވިފައި ނެތުމަކީ ކަންބޮޑުވާންޖެހޭ ކަމެއް ކަމަށެވެ.
ނަސީބާ ވިދާޅުވީ ކޮމެޓީގެ މަސައްކަތްތަކުގެ ތެރެއިން ރަސްމީ ލިޔެކިއުމުގެ ހުރިހައި މަސައްކަތްތަކެއްވެސް މިހާރު ކުރަންޖެހެނީ ކައުންސިލުން ކަނޑައަޅާ ފިރިހެން މުއައްޒަފެއްގެ ބެލުމުގެދަށުން ކަމަށެވެ.
އަންހެނުންގެ ކޮމެޓީގެ މެންބަރުންނަށް މުސާރަދެނީ ކައުންސިލުގެ ބަޖެޓުގެ 5 ޕަސެންޓުގެ ތެރެއިންކަން ފާހަގަކޮށް ނަސީބާ ވިދާޅުވީ އެދެވޭ މުސާރައެއް ކައުންސިލްގެ ބަޖެޓުގެ 5 ޕަސެންޓުން ނުލިބުމަކީ ކަންބޮޑުވާންޖެހޭ ވަރުގެ ކަމެއް ކަމަށެވެ.
އަންހެނުންގެ ތަރައްގީއަށް މަސައްކަތްކުރާ ކޮމެޓިތަކަކީވެސް ޒިންމާާރު މަސައްކަތްތަކެއް ކުރައްވަމުން ގެންދަވާ ކޮމެޓީތަކެއްކަން ފާހަގަކުރައްވަމުން ނަސީބާ ވިދާޅުވީ ބައެއް ރަށްރަށުގެ ކޮމެޓީތަކުގެ މަސައްކަތްތައް ގޮންޖެހުންތަކަކާއެކު ނުކުރެވޭ ކަމުގެ މައުލޫމާތުވެސް ލިބިފައިވާ ކަމަށެވެ.
އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ކަންބޮޑުވުން އޮތް މިދަނޑިވަޅުގައި މިއަދު ވަނީ މިފަދަ މައްސަލައެއް ރައްޔިތުންގެ މަޖިލީހުގެ ލާމަރުކަޒީ ކޮމެޓީއަށްވެސް ހުށައަޅާފަ އެވެ.
