ހެލްތު މިނިސްޓްރީން ރާއްޖޭގެ އެކި ސަރަހައްދު ތަކުގައި މަސައްކަތް ކުރާނެ ބޭރު ނަރުހުންނާއި ޑޮކްޓަރުން ހޯދަން އިއުލާން ކުރުމާއި ގުޅިގެން ގިނަ ބަޔަކު ކަންބޮޑުވުން ފާޅުކުރައްވަމުން ގެންދަވަނިކޮށް އާދިލް ވަނީ މިކަމުގެ ހަގީގަތް ސީއެންއެމް އާ ހިއްސާ ކުރައްވާފަ އެވެ.
"ސީއެންއެމް" އަށް މިއަދު ދެއްވި އިންޓަވިއުއެއްގައި އާދިލް ވިދާޅުވީ، ބޭރު ޑޮކްޓަރުންނާއި ނަރުހުން ހޯދަން އިއުލާން ކުރީ އެ މަސައްކަތައް ބޭނުންވާ ދިވެހިން ނުލިބުމުން ކަމަށާއި، ދިވެހިން ހޯދަން މީގެ ކުރިން އިއުލާން ކުރި ކަމަށެވެ. އަދި ބޭރު ޑޮކްޓަރުންނާއި ނަރުހުން ހޯދަން އިއުލާން ކޮށްފައި ވީނަމަވެސް، ދިވެހި ޑޮކްޓަރުންނާއި ނަރުހުންނަށް އަބަދުވެސް ރާއްޖެއިން ފުރުސަތު އޮންނާނެ ކަމަށަ އާދިލް ވިދާޅުވި އެވެ.
މީގެ އިތުރުން އާދިލް ވިދާޅުވީ، އެންމެ ފަހުން ޑޮކްޓަރުންނާއި ނަރުހުން ހޯދުމަށް ކޮށްފައިވާ އިއުލާނަކީ، ރާއްޖޭގެ އަތޮޅު ތަކުގައި މަސައްކަތް ކުރުމަށް ބޭނުންވާ ޑޮކްޓަރުންނާއި ނަރުހުން ހޯދަން ކޮށްފައިވާ އިއުލާނެއް ކަމަށެވެ. އަދި ދިވެހި ޑޮކްޓަރުންނާއި ނަރުހުން އަތޮޅު ތެރެއަށް ހޯދުމަށް ދަތިތަކެއް ހުރި ކަމަށް އާދިލް ފާހަގަ ކުރެއްވި އެވެ.
އާދިލް ވިދާޅުވީ، މިނިސްޓްރީން ވަޒީފާއަށް އިއުލާން ނުކުރި ނަމަވެސް ދިވެހި ޑޮކްޓަރުންނާއި ނަރުހުންގެ އިތުރުން ސިއްހީ އެހީތެރިންނަށް އަބަދު ވެސް ވަޒީފާއަށް އެދުމުގެ ފުރުސަތު ހުޅުވާލާފައި އޮންނަ ކަމަށާއި، އެ ފަރާތްތަކުން ވަޒީފާއަށް ކުރިމަތިލުމުން ބޭރު ޑޮކްޓަރުން، ނުވަތަ ނަރުހުންގެ ބަދަލުގައި ދިވެހިންނަށް އެ ވަޒީފާ ހަމަޖައްސައި ދެމުން އަންނަ ކަމަށެވެ.
މީގެ އިތުރުން އާދިލް ވިދާޅުވީ، ދިވެހިންނަށް ފުރުސަތު ނެތްކަމަށް ބުނެ ދައްކަނީ ހަގީގަތެއް ނެތް ވާހަކަ ކަމަށާއި ރައްޔިތުންނަށް ހަގީގަތް ހާމަކުރުމުގައި ހުރިހާ ފަރާތަކުން އިސްކަން ދޭން ވާނެ ކަމަށެވެ.
