"ސީއެންއެމް" ދެއްވި އިންޓަރވިއުއެއްގައި ރައީސުލްޖުމްހޫރިއްޔާގެ އޮފީހުގެ ތަރުޖަމާން މުހައްމަދު މަބުރޫކް އަޒީޒް ވިދާޅުވީ ވިއަވަތި ކޮންފަރެންސްގެ ދައުވަތު ސިޓީ ކައުންސިލަށް ފޮނުވާފައިވަނީ މި މަހުގެ 21 ވަނަ ދުވަހު ކަމަށެވެ.
މަބްރޫކް ވިދާޅުވީ މިމަހުގެ 23 ވަނަ ދުވަހު މާލޭ ސިޓީ ކައުންސިލުން މި ކޮންފަރންސްގައި ބައިވެރި ނުވެވޭނެ ކަމަށް ބުނެ ސިޓީ ފޮނުވާފައިވާ ކަމަށެވެ.
މާލޭ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް މިއަދު ވިދާޅުވީ މި ކޮންފަރެންސްގައި ބައިވެރިވުމަށް ދައުވަތު ދީފައިވަނީ އެލްޖީއޭއިން ކަމަށާއި، ދައުވަތު ދީފައި ވަނީ ހަމައެކަނި މާލޭ ސިޓީ ކައުންސިލްގެ މޭޔަރަށް އެކަނި ކަމަށެވެ.
ނަމަވެސް މަބްރޫކް ސީއެންއެމްއަށް ވިދާޅުވީ ސިޓީ ކައުންސިލަށްވެސް ދީފައިވަނީ އެހެން ކައުންސިލްތަކަށްވެސް ދީފައިވާ ސިޓީގެ ކޮޕީއެއް ކަމަށާއި، ސިޓީގައި މޭޔަރަށް ބައިވެރި ނުވެވޭނަމަ ބަދަލުގައި ބޭފުޅަކު ހަމަޖެއްސިދާނެކަމަށް ބުނެފައިވާ ކަމަށެެވެ.
ބައެއް މީޑިޔާތަކަށް މައުލޫމާތުދެއްވަމުން ކައުްނސިލްގެ ޑެޕިއުޓީ މޭޔަރު ނަރީޝް ވިދާޅުވެފައިވަނީ މި ކޮންފަރެންސް ބޮއިކޮޓް ނުކުރާ ކަމަށެވެ. އަދި ބުނެފައިވަނީ މި ކޮންފަރެންސްގެ ދައުވަތު ލިބުނީ ލަހުން ކަމަށެވެ. ނަމަވެސް މަބްރޫކް ވިދާޅުވެފައިވަނީ ލަހުންކަމަށް ބުނާ ވާހަކައަކީ ވެސް ހަގީގަތެއް އޮތް ވާހަކައެއް ނޫންކަމަށެވެ.
