އެސްޓީއޯގެ ތެޔޮ ސްޓޯރޭޖް އިހަވަންދިއްޕޮޅުގައި އަޅަން ނިންމައި އެކަން އިއުލާނުކުރެއްވީ ރޭ ކްރޮސް ރޯޑުގައި ބޭއްވި އެކުންފުނީގެ އަހަރީ އާންމު ޖަލްސާގައި ކުންފުނީގެ މެނޭޖިންގ ޑިރެކްޓަރު ހުސެއިން އަމްރެވެ. 

އަމްރު ވިދާޅުވީ އިހަވަންދިއްޕޮޅުގައި ތެޔޮ ސްޓޯރޭޖް ގާއިމުކުރުމަށް ނިންމާފައިވަނީ އެސަރަހައްދުން ލިބެން ހުރި ޖާގަ ތަކާއި، ތެލުގެ ވިޔަފާރިއަށް އެންމެ ފުޅާ ސަރަހައްދެއްގެ ގޮތުގައި އެސަރަހައްދު ފާހަގަ ކުރެވޭތީކަމަށެވެ. 

އަމްރު ވިދާޅުވީ އިހަވަންދިއްޕޮޅު ސަރަހައްދުން ކޮންމެ ދުވަހަކު ވެސް 300 އަށްވުރެ ގިނަ އާގުބޯޓު ދަތުރުކުރާ ކަމަށާއި އެސްޓީއޯގެ ވިސްނުމަކީ އެ ސަރަހައްދުގައި ބަންކަރިންގެ ހިދުމަތް ދޭން ފެށުމުން ޑިމާންޑް އޮންނާނެ ކަމަށެވެ. 

ފްލޯޓިން ސްޓޯރޭޖެއްގެ ގޮތުގައި ތެލުގެ ވިޔަފާރި ފުޅާކުރުމަކީ ގައުމުގެ އިގްތިސާދަށް އެކަމުން ވަރަށްބޮޑެތި ފައިދާތަކެއް ލިބިގެންދާނެ ކަމެއް ކަމަށެވެ. 

އެސްޓީއޯއިން މިވަގުތު އެއްގަމުގައި ތެޔޮ ރައްކާކުރަން ބޭނުންކުރަނީ މާލެ ކައިރިން އޮންނަ ފުނަދޫ އެވެ. މި ރަށުގައި ހުންނަ 14 ޓޭންކުގައި އެއްފަހަރާ ރައްކާކުރެވެނީ 48،000 މެޓްރިކު ޓަނުގެ ޑީސަލް އަދި 10،000 މެޓްރިކު ޓަނުގެ ޕެޓްރޯލެވެ.