ރާއްޖޭގައި ހުންނަ އިންޑިއާގެ ހައި ކޮމިޝަނުން ރާއްޖޭގެ މީޑިއާއަތަކަށް އިންތިޒާމުކުރި ފެމިލަރައިޒޭޝަން ވިޒިޓްގަައި އިއްޔެ ނޫސްވެރިން ވަނީ އެފްކޯންސް އާއި ބައްދަލުކޮށް އެކުންފުނިން ރާއްޖޭގައި ހިންގަމުންދާ މަޝްރޫއުތަކާއި ގުޅޭ އެންމެ ފަހުގެ މައުލޫމާތު ސާފުކޮށްފަ އެވެ.
އެފްކޯންސްގެ އިސްވެރިންނާއިއެކު ނޫސްވެރިން ބޭއްވި އެބައްދަލުވުމުގައި ތިލިމާލެ މަޝްރޫއު ނިމޭނެ ތާރީހާއި ބެހޭގޮތުން ސުވާލުކުރުމުން އެމަޝްރޫއުގައި އިސްކޮށް ހަރަކާތްތެރިވާ، ޑިރެކްޓަރު އޮފް އޮޕަރޭޝަން އާރްވީއާރް ކިޝޯރު ވިދާޅުވީ، އެމަސައްކަތް ހަމަޖެހިފައިވާ މުއްދަތައް ނިންމާލެވޭނެ ކަމުގެ ޔަގީންކަން އަރުވާ ކަމަށާއި، މިވަގުތު އެސަރަހައްދުގެ ބިމުގެ ވަރުގަދަކަން ވަޒަން ކުރުމަށް ކުރަންޖެހޭ މުހިންމު ޖިއޯޓެކްނިކަލް ސާވޭގެ 50 އިންސަތަ ނިމިފައިވާއިރު، އެމަސައްކަތްވެސް މި އަހަރުގެ އޮކްޓޫބަރަށް ނިމޭނެ ކަމަށެވެ.
އޭނާ ވިދާޅުވިގޮތުން، މާލެ އާއި ވިލިމާލެ އާއި ދެމެދު ގުޅާލުން 2023 ޖުލައި 23 އަށް ނިމޭނެއެވެ. އަދި އެދެމެދު އާންމު ދަތުރުތައް ކުރަން އަންނަ އަހަރު އޮގަސްޓް 15 ގައި ފެށޭނެއެވެ.
ބްރިޖް މަސައްކަތުގެ ތާރީހުތައް
- ގުޅިފަޅާއި ތިލަފުށި ވެސް 2023 ޑިސެމްބަރަށް ނިމޭނެ
- މުޅި ބްރިޖް މަޝްރޫއު ނޮވެމްބަރު 2024 އަށް ނިމޭނެ
އެފްކޯންސްގެ އިސްވެރިން ނޫސްވެރިންނާއި ބައްދަލުކުރަނީ——ފޮޓޯ:ސީއެންއެމް/ބޮމްބޭ
ތިލަމާލެ ބުރިޖަކީ ޖުމުލަ 500 މިލިއަން ޑޮލަރު (7.7 ބިލިއަން ރުފިޔާ)ގެ މަޝްރޫއެކެވެ. އެ މަޝްރޫއަށް ބޭނުންވާ މާލީ އެހީ ހަމަޖައްސާފައި ވަނީ އިންޑިއާގެ ހިލޭ އެހީގެ ދަށުންނާއި އެ ގައުމުގެ އެގްޒިމް ބޭންކުގެ ލައިން އޮފް ކްރެޑިޓުގެ ދަށުންނެވެ.
މި މަޝްރޫއުގެ މަސައްކަތުގައި މިވަގުތުވެސް ސައިޓުގައި 500 މީހުން މަސައްކަތްކުރެއެވެ. އެފޯކޯއިން ބުނީ، މި އަހަރު ނިމޭއިރު އެ އަދަދު 1،227 އަށް އިތުރުވާނެ ކަމަށެވެ.
