ވަޒީފާއާ ބެހޭ ޓްރައިބިއުނަލުން، ތ. ކަނޑޫދޫ ސްކޫލުގެ ޕްރިންސިޕަލް އެ އަތޮޅު ވަންދޫ ސްކޫލަށް ކުއްލި ގޮތަކަށް ބަދަލު ކުރި މައްސަލަ ނިންމާފައިވަނީ މިދިޔަ ހަފްތާގެ އަންގާރަ ދުވަހުއެވެ. މިއީ، ދެހާސް ވިހިވަނަ އަހަރުގެ އޮގަސްޓް މަހުގެ ތެރޭގައި، ކަނޑޫދޫ ސްކޫލުގެ ޕްރިންސިޕަލަށް ކުރިން އެންގުމަކާ ނުލައި ކުއްލި ގޮތަކަށް އޭނާ އެ އަތޮޅު ވަންދޫ ސްކޫލަށް ބަދަލުކުރުމާ ގުޅިގެން އޭނާގެ ފަރާތުން ހުށަހެޅި މައްސަލައެކެވެ.
އެޑިއުކޭޝަން މިނިސްޓްރީގެ އެދުމަކަށް ކަނޑޫދޫ ސްކޫލުގެ ޕްރިންސިޕަލް، ވަންދޫ ސްކޫލުގެ ޕްރިންސިޕަލްކަމަށް ބަދަލުކޮށްފައިވަނީ އެއް އަހަރު ދުވަހުގެ މުއްދަތަށް ވަގުތީ ގޮތުން ނަމަވެސް އެއް އަހަރު ދުވަސް ހަމަވުމުން، ވަންދޫ ސްކޫލުގެ ޕްރިންސިޕަލް ކަމަށް ދާއިމީކޮށް ހަމަ ޖެއްސިއެވެ. އެހެންނަމަވެސް ވަޒީފާއާބެހޭ ޓްރައިބިއުނަލުން ނިންމާފައިވަނީ އެ ބަދަލު ކުރުމަކީ ގާނޫނާ ޚިލާފަށް ބަދަލުކޮށްފައިވާ ބަދަލުކުރުމެއް ކަމަށާއި އަދި ޕްރިންސިޕަލް ކުރިންވެސް އަދާ ކުރަމުން ދިޔަ ކަނޑޫދޫ ސްކޫލުގެ ޕްރިންސިޕަލްކަމުގެ މަގާމަށް ބަދަލު ކުރުމަށެވެ.
އިތުބާރު ހުރި ފަރާތަކުން މައުލޫމާތު ލިބިފައިވާ ގޮތުގައި ކަނޑޫދޫ ސްކޫލުގެ ޕްރިންސިޕަލް ބަދަލުކުރުމުގައި އެ ރަށުގައި ހިނގަމުންދާ ސިޔާސީ ވާދަވެރިކަން ހިމެނެއެވެ. އަދި ޕްރިންސިޕަލް ބަދަލު ކުރުމުގައި ސިޔާސީ ގޮތުން ބާރު ގަދަ ފަރާތްތަކުގެ ބައިވެރިވުން އެކި މިންވަރަށް ހިމެނިފައިވާ ކަމަށްވެސް ކަމުގެ ހަގީގަތް އެނގޭ މީހެއްގެ ފަރާތުން މައުލޫމާތު ލިބިފައިވެއެވެ.