ރާއްޖޭގެ އެންމެ ދުވަސްވީ ސިޔާސީ ޕާޓީ ކަމަށްވާ، އެމްޑީޕީއަށް 17 އަހަރު ފުރުމުގެ މުނާސަބަތުގައި މިއަދު ބޭއްވި ދިދަ ނެގުމުގެ ރަސްމިއްޔާތުގައި ރައީސް ނަޝީދު ދެއްކެވި ވާހަކަފުޅުގައި ވިދާޅުވީ، ދިވެހިންގެ އާންމު ދިރިއުޅުމަށް ބުރޫއަރުވަން މަސައްކަތް ފަށައިފިނަމަ ރާއްޖެ ސަލާމަތުގެ އައްސޭރިއަކަށް ނުދާނެ ކަމަށެވެ.
އަދި ރާއްޖޭގައި ޔޯގާ ހެދުމާއި ކަސްރަތު ކުރުމަކީ، އިސްލާމްދީނާއި ހިލާފުކަމެއް ކަމަށްބުނެ ވާހަކަ ދައްކާނަމަ ރާއްޖެ ސަލާމަތުގެ އައްސޭރިއަކަށް ނުދާނެ ކަމަށްވެސް އެމަނިކުފާނު ވިދާޅުވި އެވެ.
މީގެ އިތުރުން ރައީސް ނަޝީދު ވިދާޅުވީ، ދުނިޔޭގެ އެހެން ގައުމުތައް ބާކީވެ ހަލާކުގެ އައްސޭރިއަށް ގޮސްފައިވާ މަންޒަރު ފެނިފައި ވާކަމަށާއި، ދިވެހި ރާއްޖެ އެ ހާލަތައް ދިއުމަށް އެއްވެސް ފަރާތަކުން ފުރުސަތު ދީގެން ނުވާނެ ކަމަށެވެ.
ރައީސް ނަޝީދުގެ ވާހަކަފުޅު ނިންމަވާލައްވަމުން އިތުރަށް ވިދާޅުވީ، އެމްޑީޕީއަކީ ދިވެހިން އެދޭ ދިވެހި ރާއްޖެ ރައްޔިތުންނަށް ހޯދައިދިނުމަށް އަބަދުވެސް މަސައްކަތް ކުރާ ޕާޓީއެއް ކަމަށާއި، ކުރިއަށް އޮތް ތަނުގައިވެސް އެމްޑީޕީއިން މަސައްކަތް ކުރަމުން އަންނާނީ އެގޮތަށް ކަމަށެވެ.