ގާތްގަނޑަކަށް 40 އެއްހާ ޒުވާނުން ނިކުމެ، ކައުންސިލުގެ އިދާރާ ބަންދުކޮށް އެތަނުގައި ބެނާތައް ދަމާ ޖޯލިފަތިތައް ބަހައްޓައިގެން ސުލަހެވެރި އިހުތިޖާޖެއް މިވަގުތުވެސް ދަނީ ކުރަމުންނެވެ.
އެ އިހުތިޖާޖުގެ ތެެރެއިން ވާހަކަދެއްކި ޒުވާނަކު "ސީއެންއެމް" އަށް ބުނީ، އެ އިހުތިޖާޖު ކުރަމުންދަނީ، މީގެ އަހަރެއް ކުރިން ގޯތި ދޫކުރުމަށް ހުޅުވާލި، ގޯތިތައް ދޫކުރުން މަޑުޖަައްސާލާފަވާތީ ވަރަށް ގިނަ ގޮތްގޮތުން ގޯތިތައް ދޫކުރުމުގެ މަސައްކަތް ފަށައިދޭތޯ އެކި އިދާރާތަކާއި ވާހަކަދައްކާވެސް އަލިމަގެއް ނުފެނުމުން ކަމަށެވެ.
ކައުންސިލް އިދާރާ ބަންދުކޮށްފަ---ފޮޓޯ:ސީއެންއެމް/ދިގުރަށް
ކައުންސިލުން ސީއެންއެމް އަށް ބުނިގޮތުގައި އެފަހަރު ހުޅުވާލި 77 ގޯއްޗަށް ކުރިމަތިލިމީހުންގެ ތެރެއިން 55 މީހަކު ގޯތި ލިބުމަށް ޝަރުތުހަމަވެފައިވާ ކަމަށެވެ.
ގޯތި ދޫކުރަން ނުފެށިއޮތީ، އެރަށުން ގެވަޅުތަަކަށް ކުރިމަތިލުމަށް ހުޅުވާލި ފުރުސަތުގައި ގެވަޅު ލިބުމުގެ ޝަރުތުހަމަނުވެގެން ގޯތި ލިބޭމީހުންގެ ލިސްޓުގައި ނުހިމެނުނު މީހަކު އެރަށު ކޯޓަށް ހުށަހަޅާފަވާ މައްސަލައަކާއި ގުޅިގެން ނެވެ.
ގޯތި ދޫކުރުމުގައި ޕޮއިންޓު ދޭ އުސޫލާއި ބެހޭގޮތުން އޭނާ ކޯޓަށް ހުށަހެޅި އެމައްސަލާގައި ކޯޓުން އެފަހަރު ނިންމީ، އެކަމުގައި ކޯޓުން ހުކުމެއް ކަނޑައަޅަން ދެން މިހާރު ގޯތިދޭން އޮތް ލިސްޓުގައި ހިމެނޭ އެއްވެސް މީހަކަށް ގޯތިދޫނުކޮށް މަޑުޖައްސާލުމަށެވެ.
އެހެންކަމުން އެ އަމުރާއި ގުޅިގެން ކައުންސިލުން ގޯތިދިނުން މިހާރު އޮތީ މަޑުޖައްސާލާފަ އެވެ. ނަމަވެސް އެމައްސަލަ ކޯޓުގައި އޮންނަތާ ހަވަރަކަށް މަސްވެގެންދިޔައިރު، ހުކުމަކާއި ހަމަޔަށް ނާދެވިގެން ގޯތި ދިނުމުގެ ހައްގުލިބޭ އެހެން އެންމެންގެ ހައްގުތަކުން މަހުރޫމުވެގެންދާތީ ކައުންސިލުންވެސް ވަނީ އެމައްސަލާގައި އެކި ގޮތްގޮތުން އިދާރާތަކާއިއެކު މަސައްކަތްކޮށްފަ އެވެ.
ފޮޓޯ:ސީއެންއެމް/ދިގުރަށް
އިހުތިޖާޖުގެ ބައިވެރިން ކައުންސިލް ބަންދުކޮށްފައިވަނީ މިއަދު 11:00 ހާއިރު ކައުންސިލް އިދާރާއަަށް ގޮސް ކައުންސިލާއި އެންމެ ފަހުގެ ވާހަކަތައްވެސް ދެއްކުމަށްފަހު އެވެ. 11:30 ގައި ކައުންސިލުގެ އިދާރާ ބަންދުކޮށް އެތަނުގައި ޒުވާނުން އިހުތިޖާޖު ފެށިއިރު، ކައުންސިލުގެ މެމްބަރުންނާއި، މުވައްޒަފުން ވަނީ އެތަން ބަންދުކޮށް ގެއަށް ގޮސްފަ އެވެ.
ފޮޓޯ:ސީއެންއެމް/ދިގުރަށް
އެތަނުގައި ތިބި ޒުވާނުން ނިންމާފަވަނީ، އެމީހުން ތިބީ މިރޭ ވެސް އަދި މާދަމާވެސް އެ އިހުތިޖާޖުގައި ދެމިތިބުމަށެވެ. އަދި އެމައްސަަލައަށް ހައްލުހޯދައިދެވެންދެން އެމަސައްކަތް ނުހުއްޓާނެ ކަމަށާއި، އެތަނުގައި ކައްކައިގެން ކެވޭނެ އިންތިޒާމުވެސް މިހާރު އެމީހުންވަނީ ހަމަޖައްސާފަ ކަމަށް ބުންޏެވެ.
ދިގުރަށަކީ ޖުމްލަ 55.3 ހެކްޓަރުގެ ބޮޑު ބިމެއް އޮންނަ ރަށެކެވެ. 685 މީހުންގެ އާބާދީއެއް އޮންނަ މިރަށުގައި 100އަށްވުރެ ގިނަމީހުން ބޯހިޔާވަހިކަމަށް ބޭނުންވެގެން ހުށަހަޅާފަވާކަމަށް އެރަށު ކައުންސިލުން ބުނެއެެވެ.
