އަންނަ މަހު ދައުލަތުގެ ރިޒާވް ނުރައްކާ ވާ ވަރަށް ދަށްވެދާނެ ކަމާއި، ދައުލަތުގެ ރިޒާވް ހުސްވެދާނެ ކަމުގެ ކަންބޮޑުވުން ނަޝީދު ފާޅުކުރައްވާފަ ވަނިކޮށް، ނަޝީދުގެ ކޮއްކޯފުޅު އީވާ ވަނީ، ޖުލައި މަސް ނިމޭއިރު، ސަރުކާރަށް ބޭނުންކުރެވޭ ދައުލަތުގެ ރިޒާވުގައި، ކާޑުގެ، ތެލުގެ، އަދި ބޭހުގެ ފައިސާ ހުންނާނެތޯ ސާފުކުރަން ފިނޭންސް މިނިސްޓަރަށް ސުވާލު ހުށަހަޅާފަ އެވެ.
ލިއުމުން ޖަވާބު ހޯދަން އީވާ ހުށަހެޅި އެ ސުވާލުގެ ޖަވާބުގައި އަމީރު ވިދާޅުވީ، ރާއްޖޭގެ ބޭރު ފައިސާގެ ރިޒަވް މެނޭޖްކުރުން ގާނޫނީ ގޮތުން ހަވާލުކުރެވިފައިވަނީ މޯލްޑިވްސް މޮނިޓަރީ އޮތޯރިޓީ(އެމްއެމްއޭ)އަށް ކަމަށާއި، ރިޒާވްގެ ތަފާސްހިސާބުތައް ބަލަހައްޓައި އަންދާޒާތައް ތައްޔާރުކުރުމަކީ ވެސް އެ އޮތޯރިޓީގެ ޒިންމާއެއް ކަމަށެވެ.
އަދި ބޭރު ފައިސާގެ ރިޒާވްގެ ތެރެއިން ސަރުކާރަށް ބޭނުން ކުރެވޭ ފައިސާ ނުވަތަ ޔޫސަބުލް ރިޒާވް މިވަގުތު އެމްއެމްއޭއިން ޝާއިއު ނުކުރާ ކަންވެސް އަމީރު ފާހަގަކުރެއްވި އެވެ.
އަދި އެކަމާއި ގުޅޭ އިތުރު މައުލޫމާތު އެމްއެމްއޭއިން ސާފުކުރުމަށް މިނިސްޓަރު ވަނީ އެދިފައެވެ. މީގެ އިތުރުން ރިޒާވް މެނޭޖުކުރުމަށް ދައުލަތުން ބޭނުންވާ އެއްބާރުލުން އެމްއެމްއޭއަށް އަބަދުވެސް ދެމުންދާނެކަމަށްވެސް އަމީރު ވިދާޅުވި އެވެ.
މި ޖާވުބު މަޖިލީހުގެ އަމީން އާއްމު އިއްވާ ނިންމަވާލެއްވުމުން، މަޖިލީހުގެ ރައީސް މުހައްމަދު ނަޝީދު ވަނީ އެޖަވާބާއި މެދު ހިތްހަމަ ޖެހިވަޑައިނުގަތް، މާލީ ކަންކަމަކީ މާލީ ވަޒީރާއި ހަވާލުވެފަ ނުވާކަމެކޭ އަމީރަށް ވިދާޅުނުވެވޭނެ ކަމަށް ވިދާޅުވެފަ އެވެ.
ނަޝީދު ވިދާޅުވީ މަޖިލީހުން އެދޭ ކޮންމެ މައުލޫމާތެއް ސާފުކޮށްދީ މަޖިލީހުން ބޭނުންވެއްޖެ ހިދެއްގައި މަޖިލީހަށް ޖަވާބުދާރީވުމަކީ މިނިސްޓަރަށް ގާނޫނުން ވާޖިބުކުރާ ކަމެއް ކަމަށާއި، އެހެންކަމުން މަޖިލީހުން ކުރާ ސުވާލުތަކަށް މިނިސްޓަރު ސާފުސީދާކޮށް ޖަވާބުދާރީވާންޖެހޭނެ ކަމަށެވެ.
