ޕީޕީއެމްއިން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީން ވަނީ 2023ގައި އެ ޕާޓީގެ ޓިކެޓުގައި ވާދަ ކުރައްވާނީ ރައީސް އަބްދުﷲ ޔާމީން އަބްދުލްގައްޔޫމް ކަމުގެ ޔަގީންކަން ދެއްވާފަ އެވެ. އަދި އެމަނިކުފާނަށް ވާދަނުކުރެވޭ ހިސާބެއްގައި ވެސް ދެން ކަންތައް ކުރަންވާ ގޮތް ޕާޓީގެ އަސާސީ ގަވާއިދުގައި އޮންނަ ކަމަށް ބުންޏެވެ.
ޕީއެންސީގެ ރައީސް އަބްދުރަހީމް އަބްދުﷲ(އަދުރޭ) ވިދާޅުވީ، އެ ހާލަތުގައިވެސް އަދި ޔާމީން އާ އެކު ވާދަކުރާ ނަމަވެސް، މިހާރު މިއޮތް ސަރުކާރު ގެނައުމަށް އެހީތެރިވި އެއްވެސް ޕާޓީއަކާ އެކު ބައިތު ނުހިފާނެ ކަމަށެވެ.
އަދި ރައީސް ޔާމީން އާއި ގުޅުވައި އަބުރު ކަތިލާ، ކޯޓުތަކަށް ނުފޫޒުފޯރުވައިގެން ރައީސް ޔާމީން ޖަލަށް ލުމަށް އެންމެ ބޮޑަށް މަސައްކަތް ކުރަނީ ޖޭޕީގެ ލީޑަރު ގާސިމް އިބްރާހިމް ކަން ފާހަގަ ކުރައްވާ އަދުރޭ ވިދާޅުވީ، ގާސިމް ހީފުޅުކުރައްވަނީ ރައީސް ޔާމީން ޖަލަށް ގޮސްފިނަމަ 2023ގައި ޕީޕީއެމް އިން ޖޭޕީ އާ އެކު ކޯލިޝަން ހަދާ ގާސިމަށް ޓިކެޓު ދޭނެ ކަމަށް ކަމަށެވެ.
އަދުރޭ ވިދާޅުވީ، އިންޑިއާގެ ނުފޫޒުގައި ޖެހި ރާއްޖޭގެ މިނިވަންކަން ނާގާލި އެއްވެސް "ޚާއިނެއްގެ" ފަހަތަށް ޕީޕީއެމް އިން ނާރާނެ ކަމަށާއި، ރައީސް ޔާމީނަށް ވާދަ ނުކުރެވޭނެ ފޯމިއުލާއެއް ވެސް ވާދަވެރި ފަރާތްތަކަށް ނުނެރެވޭނެ ކަމަށެވެ.
