މި މައްސަލާގައި ދައުލަތުން ގަސްތުގައި މީހަކު މަރާލި ކަމުގެ ދައުވާ އުފުލާފައި ވަނީ ޕާކިސްތާނުގެ ރައްޔިތެއް ކަމަށްވާ މުހައްމަދު އާބިދުގެ މައްޗަށެވެ.
މިއަހަރުގެ އެޕްރީލު މަހުގެ 16 ވަނަ ދުވަހުގެ ހަވީރުގެ ވަގުތެއްގައި ހުޅުމާލެ ނިރޮޅުމަގު 19 ނަންބަރު ގޯޅިގައި ހުންނަ ހާންޖީ ރެސްޓޯރެންޓުގެ ބަދިގެ ތެރޭގައި ބަންގްލަދޭޝްގެ ރައްޔިތަކަށް ތޫނު އެއްޗަކުން ހަމަލާދީ މަރާލިކަމަށް ތުހުމަތުކުރެވުނު މައްސަލައިގައި އާބިދުގެ މައްޗަށް، ދައުވާ އުފުލީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން، ތޫނުއެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ އެވެ.
މި މައްސަލައިގާ މިއަދު ހެނދުނު 11:00 އަށް އަޑުއެހުމެއް ވަނީ ތާވަލްކޮށްފައެވެ. އެހެންނަމަވެސް މައްސަލައިގައި ހިމެނޭ ހެކިން މިއަދު ކޯޓަށް ހާޒިރުނުކުރެވުމުގެ ސަބަބުން މިއަދަށް ތާވަލްކުރި އަޑުއެހުން ވަނީ ކެންސަލްކޮށްފަ އެވެ.
އާބިދުގެ މައްޗަށް ދައުވާކުރަން ޕްރޮސިކިއުޓާ ޖެނެރަލް (ޕީޖީ) ފޮނުވާފައިވަނީ މިދިޔަ މަހުގެ 15 ވަނަ ދުވަހުގަ އެވެ.
ބަންގްލަދޭޝް މީހާ މަރާލި މައްސަލައިގައި ހައްޔަރު ކޮށްފައިވާ ޕާކިސްތާނުގެ މުހައްމަދު އާބިދު
އުމުރުން 26 އަހަރުގެ އަބީދު ބަގްލަދޭޝްގެ ރައްޔިތެއްކަމަށްވާ އެމްޑީ ޝަމީމް އަށް ހަމަލާދީފަ ވަނީ ވަޅިންނެެވެ. ޝަމީމް އެވަގުތު މަސައްކަތް ކުރަމުންދިޔައީ ކިޗަން ހެލްޕަރެއްގެ ގޮތުގަ އެވެ. ދެމީހުންގެ ދެމެދުގައި ހިނގި ހަމަނުޖެހުމެއްގެ ތެރޭ ޝަމީމުގެ ހަށިގަނޑުގެ އެތައް ތަނަކަށް ވަޅި ހެރުމަށްފަހު އަބީދު ފިލީއެވެ. އޭނާ ފުލުހުން ހައްޔަރުކުރީ އަނެއް ދުވަހު ހުޅުމާލެ ދެވަނަ ފިޔަވަހީގެ އަތިރިމަތިންނެވެ.
މި ހާދިސާގައި ޝަމީމް ޒަހަމުވެގެން ހޮސްޕިޓަލަށް ގެންދިޔަ އިރުވެސް އޮތީ ހުއްޓިފައެވެ. ފަހުން އޭނާ މަރުވިކަން ހޮސްޕިޓަލުން ކަށަވަރުކޮށްދިނެވެ. ޝަމީމްގެ ހަށިގަނޑު ވަނީ އެޕްރީލް 22 ވަނަ ދުވަހު ގައުމަށް ފޮނުވާލައިފަ އެވެ.
