ބަންގްލަދޭޝްގެ ރާޖްޝަހީ ސިޓީގައި ހުންނަ އިސްލާމީ ބޭންކް މެޑިކަލް ކޮލެޖުގައި ޑޮކްޓަރުކަން ކިޔަވަމުން އައި ރައުދާގެ ހަށިގަނޑު ފެނިފައި ވަނީ ކޮލެޖު ހޮސްޓެލްގައި އޭނާ ދިރިއުޅުނު ކޮޓަރީގެ ތެރޭގައި ދަންޖެހިފައި ހުއްޓައެވެ. އެއީ 2017 ވަނަ އަހަރުގެ މާޗު މަހުގެ ތެރޭގައެވެ.
ރައުދާ ވަޅުލުމުގެ ކުރިން އަދި ވަޅުލުމަށްފަހު ދެވަނަ ފަހަރެއްގެ މަތިންވެސް އޮޓޮޕްސީ ހެދިއެވެ.
ބަންގްލާދޭޝްގެ މެޖިސްޓްރޭޓް ކޯޓުން އެގައުމުގެ ފުލުހުންގެ މައްޗަށް މި މައްސަލަ އަލުން ބެލުމަށް އަމުރު ކުރީ، ރައުދާގެ ބައްޕަ އެ ކޯޓަށް 2019 ވަނަ އަހަރު ހުށަހެޅި މައްސަލައާއި ގުޅިގެންނެވެ.
މިކަމާއި ގުޅިގެން ރައުދާގެ ބައްޕަގެ ވަކީލު އެގައުމުގެ ނޫސްތަކަށް ދިން އިންޓަވިއުއެއްގައި ބުނީ، ރައުދާގެ މަރުގެ މައްސަލާގައި ހިންގި ތަހުގީގުން އެތައް ސުވާލުތަކަށް ޖަވާބު ލިބިފައި ނުވާތީ ކަމަށެވެ.
އެގޮތުން ރައުދާ މަރުވެފައި އޮތްވާ ފެނުނު ކޮޓަރިއަށް އެ ކޮލެޖުގެ މުވައްޒަފުން ވަނީ ދޮރު ހަލާކު ކޮށްލައިގެން ކަމަށް ބުނިނަމަވެސް އެ ކޮޓަރީގެ ދޮރަށް އެއްވެސް ގެއްލުމެއް ލިބިފައި ނުވާ ކަމަށާއި، އެފަދަ އެތައް ކަމެއް ހުރިކަމަށް ވަކީލް ވަނީ ބުނެފަ އެވެ.
މީގެ އިތުރުން ވަކީލު ބުނީ މެޖިސްޓްރޭޓް ކޯޓުން ފުލުހުންގެ މައްޗަށް ކުރި އަމުރާއި އެކު ފުލުހުން ވަރަށް އަވަހަށް މައްސަލަ އަލުން ތަހުގީގު ކުރަން ފަށާނެ ކަމަށެވެ.
