އިންފޮމޭޝަން ކޮމިޝަނަރު އަހްމަދު އާހިދު ރަޝީދު، ފިނޭންސްއަށް އިންޒާރު ދެއްވާފައިވަނީ މި މަހުގެ ކުރީކޮޅުއެވެ. އެއީ އެސޯސިއޭޝަން ފޯރ ޑިމޮކްރެސީ އިން ދަ މޯލްޑިވްސްގެ ފަރާތުން ފިނޭންސް މިނިސްޓްރީން ހޯދަން އެދުނު މައުލޫމާތުތަކެއް ފިނޭންސް މިނިސްޓްރީން ނުދީގެން އެ ކަމުގެ ޝަކުވާ އިންފޮމޭޝަން ކޮމިޝަނަރުގެ އޮފީހަށް ހުށަހެޅި މައްސަލައިގެ ނިންމުމުގައެވެ. އެ ނިންމުމުގައިވާ ގޮތުން، ފިނޭންސްއިން މި އަހަރު ތެރޭގައި، މައުލޫމާތު ނުދީގެން ހަތަރު ޝަކުވާއެއް އެ އިދާރާއަށް ލިބިފައިވާކަން އެނގެއެވެ.
ފިނޭންސްއިން މައުލޫމާތު ނުދީގެން އިންފޮމޭޝަން ކޮމިޝަނަރުގެ އިންޒާރު އެ މިނިސްޓްރީއަށް ލިބިފައިވާއިރު، މައުލޫމާތު ދިނުމަށް ފިނޭންސުން ދެކޮޅު ހަދާފައިވާ މައްސަލައެއްގެ އަޑު އެހުމެއް މިއަދުވެސް އިންފޮމޭޝަން ކޮމިޝަނަރުގެ އޮފީހުގައި އެބައޮތެވެ. މިއަދު ހެނދުނަށް ތާވަލު ކުރުމަށް ފަހު މިހާރު މެންދުރަށް ފަސްކޮށްފައިވާ މި އަޑު އެހުމަކީވެސް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް އެދި ހުށަހެޅުމުން އެއްވެސް ޖަވާބެއް ދީފައިނުވާތީ އިންފޮމޭޝަން ކޮމިޝަނަށް ހުށަހެޅިފައިވާ މައްސަލައެކެވެ