އުރީދޫ އިން މިކަން އިއުލާކުރީ މިއަދު ފާހަގަ ކުރާ އެކުންފުނީގެ 17 އަހަރުގެ މުނާސަބަތާއި ގުޅުވައިގެން ނޫސްވެރިންނަށް ބޭއްވި ބައްދަލުވުމުގަ އެވެ.
މި ބައްދަލުވުމުގައި އުރީދޫގެ ޗީފް ކޮމާޝަލް އޮފިސަރު ހުސެއިން ނިޔާޒު ވިދާޅުވީ މިއަދުން ފެށިގެން މާލެ ސަރަހައްދުގެ ހުރިހައި ސަރަހައްދަކަށްވެސް އުރީދޫގެ 5ޖީ ނެޓްވޯކް ލިބިގެންދާނެ ކަމަށެވެ.
އަދި 5ޖީނެޓްވޯކް ސަޕޯޓްކުރާ ފޯނު ތަކުގެ ތެރެއިން 800 ރުފިޔާއިން މަތީގެ ޕޯސްޓްޕެއިޑް ކަސްޓަމަރުންނަށްވެސް މިއަދުން ފެށިގެން 5ޖީ ނެޓްވޯކުގެ ހިދުމަތް ލިބިގެންދާނެ ކަމަށެވެ. އަދި ވިދާޅުވީ ޕޯސްޓްޕެއިޑް ކަސްތަމަރުންނަށް މިއަދު ޑޭޓާ އެލަވަންސް ދެގުނަ އިތުރަށް ލިބިގެންދާނެ ކަމަށެވެ.
ރާއްޖޭގެ ބޮޑު ބައެއްގައި އުރީދޫ ނެޓްވޯކް މިދިޔަ ދުވަސްތަކުގައި ފުޅާކުރައްވާފައިވާ ކަން ފާހަގަ ކުރައްވަމުން ނިޔާޒް ވިދާޅުވީ އިތުރު ފަސް ރަށެއްގައި އުރީދޫގެ ސަބްމެރިން ކޭބަލް އެޅުމުގެ މަސައްކަތަޢް މިހާރު ތައްޔާރުވެފައިވާ ކަމަށެވެ.
އެގޮތުން ކ. މާފުށި، ނ. ވެލިދޫ، ރ. ދުވާފަރު، އދ. ދަގެނތި އަދި އދ. މާމިގިލީގައި އެ މަސައްކަތް ވަރަށާް އަވަހަށް ފަށްޓަވާނެ ކަމަށް ވިދާޅުވި އެވެ.
އެކުންފުނިން ވަނީ މިއަދު މާލެ ސަރަހައްދުގެ ބޮޑު ބަޔަކަށް 5ޖީ ނެޓްވޯކް ތައާރަފްކޮށް އެހިދުމަތް ލިބޭނެކަން އިުލާނު ކުރައްވާފަ އެވެ.
އުރީދޫން ތައާރަފު ކުރި 5ޖީގެ ހިދުމަތާއި އެކު ޔޫރަޕުގެ ގައުމުތަކާ ގުޅައިދޭ ސަބްމެރިން ކޭބަލެއް ހދ. ކުޅުދުއްފުށި ހިމެނޭ ސަރަހައްދުގައި ގާއިމުކުރާނެ ކަން ވެސް ވަނީ އިއުލާނު ކޮށްފަ އެވެ. އެ ކޭބަލަކީ ޔޫރަޕުގެ ގައުމުތަކުގެ ސާވާތަކާ ޑައިރެކްޓް ގުޅުވާދޭނެ ކޭބަލެއް ކަމަށް ނިޔާޒު ވިދާޅުވި އެވެ.
