ރައީސް ޔާމީނަށް ޕީޕީއެމްގެ ރިޔާސީ ޓިކެޓް ދޭން ނިންމިއިރު، އެ ޓިކެޓުގެ އުއްމީދުގައި ސިޔާސީ އެތައް ބަޔަކު ތިބިކަމީ ހަގީގަތެވެ. އެ ވާހަކަ ދައްކަން ފަހަރުގައި ބޭނުން ނުވެދާނެއެވެ. އެކަމަކު ރައީސް ޔާމީންގެ ޝަރީއަތްތަކެއް ކުރިއަށްދާތީ، ރިޔާސީ ޓިކެޓް މި ވަގުތު ޔާމީނަށް ދީފައި އޮތް ނަމަވެސް އަދިވެސް އެ ޓިކެޓުގެ ހުވަފެން ދެކޭނެ ސިޔާސީ ލީޑަރުން އެބަތިބިކަމާމެދު ޝައްކެއް ނެތެވެ.
ޑރ. މުހައްމަދު ޖަމީލް އަހްމަދަކީ ރައީސް ޔާމީންގެ ފުރަތަމަ ނާއިބު ރައީސެވެ. ދެހާސް ތޭރަވަނަ އަހަރުގެ ރިޔާސީ ކެމްޕެއިންގައި ރައީސް ޔާމީނަށްވުރެ ބުރަކޮށް ރައީސް ޔާމީނަށް ކެމްޕެއިން ކުރެއްވުމުގައި ޑރ. ޖަމީލް އުޅުއްވިއޭ ދެންނެވުން ދޮގަކަށް ނުވާނެއެވެ. އެހެންނަމަވެސް ޑރ. ޖަމީލަށް ރައީސް ޔާމީނާއެކު ކެތް ކޮށްލެވުނީ ދުވަސްކޮޅެކެވެ.
ރައީސް ޔާމީންގެ ނާއިބު ރައީސަކަށް ހުންނަވައި ރާއްޖެ ދޫކުރައްވައި އިގިރޭސިވިލާތަށް ވަޑައިގެން އެގައުމުން ހިމާޔަތް ހޯއްދަވައިގެން އުޅުއްވުމަސް ފަހު ޑރ. ޖަމީލަށް އެނބުރި ވަޑައިގެންނެވުނީ ރައީސް ޔާމީންގެ ވެރިކަން ނިމުމުންނެވެ. އޭރު ބޭރުގައި ހުންނަވައިގެން ރައީސް ޔާމީނަށް މުހާތަބުކޮށް ޑރ. ޖަމީލް ވިދާޅުނުވާ އެއްޗެއް އޮންނާނެހެން ހީނުވެއެވެ.
އެކަމަކު މިހާރު އަނެއްކާވެސް މުޅިން މަންޒަރު ބަދަލުވީއެވެ. ޑރ. ޖަމީލް މިހާރު ވިދާޅުވަނީ ވަރަށް ބޮޑު ތަފާތެއް ރައްޔިތުންނަށް ފެނިއްޖެ ކަމަށާއި، ރައީސް ޔާމީން މިނިވަންކަން ވިއްކާ ނުލައްވާނެ ކަމަށެވެ.
މިހާރުގެ ގޮތަށް ދަންނަވަންޏާ ޑރ. ޖަމީލް ކުރިން ދެއްކެވި ހުރިހާ ވާހަކައެއް ކެންސަލްއެވެ.
