ފަހަކަށް އައިސް ރާއްޖޭގައި ޑެންގޫ ޖެހޭ ކުދިންގެ އަދަދު ވަނީ އިތުރުވާން ފަށާފަ އެވެ. އެގޮތުން އިއްޔެއާއި ހަމައަށް ޑެންގޫ ޖެހިގެން ދެ ކުއްޖަކަށް ދިޔައީ އައިޖީއެމްއެޗްގެ އައިސީޔޫގައި ފަރުވާ ދެމުންނެވެ.
ކުޑަކުދިންގެ ޑޮކްޓަރު އަހުމަދު ފައިސަލް މިއަދު ވިދާޅުވީ، ޑެންގޫ ހުން ޖެހޭ ކުދިންގެ އާދަދު އިތުރުވަމުން އަންނަ ކަމަށާއި، އެގޮތުން ރޭގެ ވަގުތެއްގައި އަހަރެއް ނުވާ ކުއްޖަކަށް ޑެންގީ ޖެހިގެން ހޮސްޕިޓަލުގެ އައިސީޔޫއަށް ބަދަލުކުރަން ޖެހުނު ކަމަށެވެ. އަދި ކުއްޖާ ހޮޑުލާއިރު، ލޭ އައުމާއި ގުޅިގެން ކުއްޖާގެ ގަޔަށް ލޭ އަޅަން ޖެހުނު ކަމަށްވެސް ޑރ. ފައިސަލް ވިދާޅުވި އެވެ.
މީގެ އިތުރުން ޑރ. ފައިސަލް ވިދާޅުވީ، މީގެ ކުރިން ހޮސްޕިޓަލުގެ އައިސީޔޫއަށް ޑެންގޫ ޖެހިގެން ލީ ދެކުދިންގެ ހާލު މިހާރު ރަނގަޅު ވަމުން އަންނަ ކަމަށެވެ. އަދި މިހާރު އެކުދިންނަށް ފަރުވާ ދެމުން އަންނަނީ، ހޮސްޕިޓަލުގެ ވޯޑަށް ބަދަލު ކޮށްގެން ކަމަށްވެސް ޑރ. ފައިސަލް ވިދާޅުވި އެވެ.
މީގެ އިތުރުން ޑރ ވިދާޅުވީ، ފާއިތުވި ތިން އަހަރަށް ވުރެއް މި އަހަރު ޑެންގީ ގެ ކޭސްތައް އިތުރުވެފައި ވާކަމަށާއި، އެކަމާއި ގުޅުގެން ހުރިހާ ފަރާތްތަކުންވެސް ހާއްސަ ސަމާލުކަމެއް ދިނުމަށް އިލްތިމާސް ކުރައްވާ ކަމަށެވެ. އެގޮތުން މަދިރި އާލާވިޔަނުދިނުމަށް ހާއްސަ ސަމާލުކަމެއް ދިނުމަށާއި، މަދިރި ހެފިޔަ ނުދިނުމަށްވެސް ސަމާލުކަން ދިނުމަށް ޑރ. ފައިސަލް ވަނީ އިލްތިމާސް ކޮށްފަ އެވެ.
ޑެންގޫ ޖެހިގެން ކުއްޖަކަށް ހޮސްޕިޓަލުގެ އައިސީޔޫގައި ފަރުވާ ދެމުން އަންނަ އިރު، ރާއްޖެއިން ޑެންގޫ ޖެހުނު ކުއްޖެއް މި އަހަރު ވަނީ މަރުވެފަ އެވެ.
