ދިރާސީ އާ އަހަރު ފެށުމުގެ ގޮތުން ދެއްވި ހިތޯބުގައި، މިނިސްޓަރު މިއަދު ވިދާޅުވީ، މިއަހަރު އެންމެ އިސްކަމެއްދޭނެ އެއްކަމަކީ ތައުލީމީ ނިޒާމުގެ ފެންވަރު މަތިކުރުން ކަމަށާއި، އެކަމަށްޓަކައި އެޅޭ އެންމެ މުހިންމު ފިޔަވަޅަކީ މުދައްރިސުންނަށް ކިޔަވައިދިނުމުގެ ލައިސެންސް ދޫކުރުން ކަމަށެވެ.
މިނިސްޓަރު ވަނީ، ޓީޗަރުންގެ މުސާރާއަށް ރައީސް އިބްރާހިމް މުހައްމަދު ސޯލިހު ގެންނެވި ހެޔޮ ބަދަލު، ސްކޫލުތަކުގައި ޓީޗަރުން ދަރިވަރުންނަށް ކިޔަވައިދިނުމުގައި ބަހައްޓާ ފަރުވާތެރިކަމުން ދައްކާދިނުމަށް ވެސް އެދިވަޑައިގެންފަ އެވެ.
އަލަށް ތަންފީޒުކުރެވޭ ތައުލީމީ ގާނޫނަށް އަމަލުކުރަން ފެށިތާ އަހަރެން މި މަހުގެތެރޭގައި ފުރޭނެކަން ފާހަގަކުރައްވާ މިނިސްޓަރު ވިދާޅުވީ، ގާނޫނާ ގުޅިގެން ހަދަންޖެހޭ ހުރިހާ ގަވާއިދުތަކެއް މިހާރު ހަދާ ނިމިފައިވާ ކަމަށެވެ. އަދި މި ފެށުނު ދިރާސީ އަހަރާއެކު އެ ގަވާއިދުތައް ތަންފީޒުކުރަން ފެށޭނެ ކަމަށް ވިދާޅުވި އެވެ.
މިނިސްޓަރު ވިދާޅުވީ، ތައުލީމީ ގާނޫނޫން ހަވާލުކުރެވިފައިވާ އެންމެ ބޮޑު މައްސޫލިޔަތަކީ، ދަރިވަރުންގެ ރައްކާތެރިކަން ކަމަށާއި، އެހެންކަމުން ސްކޫލުތަކުން ދަރިވަރުންގެ ރައްކާތެރިކަން ކަށަވަރުކުރުމަށް ހާއްސަ ސަމާލުކަމެއް ސްކޫލު މާހައުލުގަޔާއި، ބޭރުތެރޭގައި ވެސް ދޭން ވާނެ ކަމަށެވެ.
މިނިސްޓަރު ވިދާޅުވީ، މުދައްރިސުން ކުރައްވާ މަސައްްކަތްތަކީ މުޅި ގައުމަށް އަދި މުޅި ޖީލަށް އޭގެ އަސަރު ފޯރާ މަސައްކަތްތަކެއްކަމުން މުދައްރިސުން ވާންވާނީ އަމަލުތައް އިހުލާސްތެރި، ހަރަކާތްތަކުން ނަމޫނާ ދައްކާ ދަރިވަރުންގެ މައުސޫމު ކަމާއި އިއްފަތްތެރިކަން ރައްކާތެރިކުރާ ބަޔަކަށް ކަމަށެވެ.
