ވައްކަމުގެ ތުހުމަތުގައި ހައްޔަރުކުރީ ޖަމާއަތް ހަދައި ރާވައިގެން ކުށްކުރާ، މާފަންނުގައި ހަރަކާތްތެރިވާ ގުރޫޕަކަށް ނިސްބަތްވާ މީހަކެވެ.
އޭނާ ވައްކަންކުރިކަމުގެ ތުހުމަތަށް ހައްޔަރުކުރުމުން އެގްރޫޕަށް ނިސްބަތްވާ މީހަކު މާފަންނު ސްޓޭޝަނަށް ވަދެ ކޮންސްޓަބަލްއަކަށް ވަނީ މަރުގެ އިންޒާރު ދީފައެވެ.
ސީޕީ ހަމީދު ދާދި ދެންމެއަކު ވިދާޅުވީ، ފުލުުުހުންގެ އިދާރާއަށްވަދެ ކޮންސްޓަބަލްއަކަށް މަރުގެ އިންޒާރުދީފައިވާތީ އޭނާވެސް ވަނީ ހައްޔަރުކޮށްފައި ކަމަށެވެ.
އޭގެފަހުން ވެސް އެސްޓޭޝަން ދޮށަށް އެގުރޫޕުގެ މީހުން ވަނީ އެއްވެފައެވެ. ސީޕީ ވިދާޅުވީ، އެއްވި އެގްރޫޕުގެ މީހުނާމެދުވެސް ފިޔަވަޅު އެޅާނެ ކަމަށެވެ.
ފުލުހުންގެ އިދާރާއަށް ވަދެ، ބަޔަކު އިންޒާރު ދިން އިރު، ޑިއުޓީ ގަޑިން ބޭރުގައި އުޅެނިކޮށް، ޑްރަގް އެންފޯސްމެންޓް ޑިޕާޓުމެންޓް(ޑީއީޑީ)ގެ ތިން ފުލުހަކަށް ވެސް ގޭންގަކުން ވަނީ މިމަހުގެ ނުވަވަނަ ދުވަހު ހަމަލާދީފައެވެ.
ހަތިޔާރު ބޭނުންކޮށްގެން ފުލުހަކަށް ހަމަލާދިން އެ މައްސަލާގައި ހަމަ އެދުވަހު 18 އަހަރުގެ މީހަކާއި، 20 އަހަރުގެ މީހަކު ހައްޔަރުކުރިއެވެ.
އޭގެފަހުން މިމަހުގެ 12 ވަނަ ދުވަހު އިތުރު މީހަކު ހައްޔަރުކުރިއެވެ. އަދި މިހާތަނަށް 10 މީހަކު އެމައްސަލާގައި ވަނީ ހައްޔަރުކޮށްފައެވެ.