އެމަނިކުފާނު އަވަހާރާވީ، މިއަދު ހެނދުނުގެ ވަގުތެއްގައި އައިޖީއެމްއެޗް ގައެވެ.
އުމުރުފުޅުން 65 އަަހަރުގައި އެމަނިކުފާނު އަވަހާރާވިއިރު، ގެންދެވީ ނިއުމޯނިއާގެ އާލާސްކަންފުޅަކަށް ފަރުވާ ހޯއްދަވަމުން ނެވެ.
ޑރ. އަބްދުﷲ ގެ އަނބިކަނބަލަކާއި ދެ ފިރިހެން ބޭފުޅުން ދުނިޔޭގައި އެބަތިއްބެވި އެވެ.
ޑރ. އަބްދުﷲ ވަހީދަކީ މަޝްހޫރު މެޑިކަލް ސާޖަންއެކެވެ. އެމަނިކުފާނު ވަނީ، ސިއްހީ ދާއިރާގެ އިތުރުން، ދިވެހި ބަހާއި، ތާރީހާއި ސަގާފަތުގެ ދާއިރާގައި ވެސް ފާހަގަކޮށްލެވޭ މަސައްކަތްޕުޅުތަކެއް ކުރައްވާފައެވެ.
އައިޖީއެމްއެޗު ހިންގެވުމުގައިވެސް މަަސައްކަތްކުރެއްވި ޑރ. އަބްދުﷲ ވަހީދު ސިއްހީ ދާއިރާއާއި ދުރަށް ޖެހިވަޑައިގަތީ، ސްޓްރޮކެއް ޖެހުމުން ނެވެ.
އާލާސްކަންފުޅާއި އުޅުއްވާތީ، ސިއްހީ ދާއިރާއާއި ދުރުގައި ހުންނެވި ނަމަވެސް އުމުރުގެ ފަހު ދުވަސްތައް ދިވެހި ބަހާއި ސަގާފަތުގެ ދާއިރާއަށް ހުސްކުރެއްވި އެވެ.
އެގޮތުން ތާރީހީ ބައެއް ކަންކަމާއި ބެހޭ މުއްސަދި މައުލޫމާތުތަކާއިއެކު ނޫސްތަކުން އެމަނިކުފާނުގެ ލިއުންތައް ވަރަށް ފަހަކާއި ޖެހެންދެން ފެނުނެވެ.
