ގޭންގުތަކުން ފުލުހުންނަށް ހަމަލާދީ މަރުގެ އިންޒާރު ދެމުންދާތީ ކާާށިދޫ ދާއިރާގެ މެމްބަރު އަބްދުﷲ ޖާބިރު، ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލައަށް ބަހުސްކުރައްވަމުން މެމްބަރު މުހައްމަދު ވަނީ، ފުލުހުންނަށް ވަރަށް ބޮޑަށް ފާޑުކިޔާއި، ފުލުހުންނަށް ހަމަލައި ދޭންޖެހޭ ސަބަބުތަކެެއްވެސް ހުންނާނެ ކަމަށް ވިދާޅުވެ ވާހަކަދައްކަވާފައެވެ.
ނޮޅިވަރަމް ދާއިރާގެ މެމްބަރު މުހައްމަދު ނަޝީދު
އޭނާ ވިދާޅުވީ، ފުލުހުން ޒާތީވެގެން ޒުވާނުންނަށް އަނިޔާކޮށްފައިވެސް އެބަހުރި ކަމަށާއި، އެކަމުގެ ސަބަބުން އެފަދަ އާއިލާތަކުން ބޮޑުވާ ކުދިންގެ ހިތުގައި ބަދަލު ހިފުމުގެ ރޫހު ހުންނާނެ ކަމަށެވެ.
މާމިގިލީ ދާއިރާގެ މެމްބަރު ގާސިމް އިބްރާހިމްގެ ގެކޮޅު، ”މާފަންނު ވިލާ“ އަށް ބަޔަކު ވަން ސަބަބާއި ބެހޭގޮތުން ވާހަކަދައްކަވަމުން ވެސް މެމްބަރު މުހައްމަދު ވިދާޅުވީ، އެތަނަށް ވަނީ ސައި ހޮޓަލަކުން ނިކުން ”ކުއްޖަކު“ ހައްޔަރުކޮށްގެން ގެންގޮސް ތަޅައި އަނިޔާކޮށް ހޮސްޕިޓަލުގައި އެޑްމިޓުކުރުމުން ކަމަށެވެ.
އޭނާ ވިދާޅުވީ މުޒާހަރާތެރެއިން އާއްމުން ހައްޔަރުކުރާ އިރުވެސް “އައުގުރާނަ ގޮވާފައި” ހިފައި ހައްޔަރުކުރާތަން ފެންނަ ކަމަށެވެ. އަދި ފުލުހުން ޒުވާނުންނާއިމެދު އަމަލުކުރާތަން ފެންނަނީ ބުލީ ކުރާ “ވައްތަރަށް” ކަމަށްވެސް އޭނާ ވިދާޅުވި އެވެ.
އޭނާ ވަނީ ރައީސް ނަޝީދަށް މުހާތަބުކުރައްވާ އެމަނިކުފާނުގެ ވެރިކަމުގައިވެސް ބޭނުންވުމުން ޒުވާނުން ބޮޑެތި ކުށްވެރިންނަށް ހަދަލައި އެމީހުންގެ މުޅި މުސްތަގުބޮލު ހަލާކުކޮށްލި ކަމުގެ ތުހުމަތު ކުރައްވާފައެވެ.
އޭނާ ވިދާޅުވީ، ފުލުހުންގެ އެފަދަ އަމަލުތައް ހުއްޓާލައި، ޒާތީ ހަސަދައިން ދުރުވެ، އެމީހުން އިސްލާހުކޮށް މުޖުތަމައުއަށް ނެރެން މަސައްކަތް ކުރުމުން ކަންކަން ހައްލުވާނެ ކަމަށެވެ.
