ads
ނޯ ޕްލާސްޓިކް މޯލްޑިވްސްގެ ސޮފްޓް ލޯންޗިން އިވެންޓްގެ ތެރެއިން
ނޯ ޕްލާސްޓިކް މޯލްޑިވްސްގެ ސޮފްޓް ލޯންޗިން އިވެންޓް ބާއްވައިފި
ނޯ ޕްލާސްޓިކް މޯލްޑިވްސް، މޯލްޑިވިއާނާ ގްރޫޕާއި ގުޅުން ފާހަގަކޮށް ނޯ ޕްލާސްޓިކް މޯލްޑިވްސްގެ ސޮފްޓް ލޯންޗިން އިވެންޓް ރާއްޖޭގެ އެންމެ ބޮޑު ސަފާރީ އުޅަނދު ކަމަށްވާ ރިޓްރެއްލާގައި ބާއްވައިފިއެވެ. މިކަމަށްޓަކައި އަންގާރަ ދުވަހު ހަވީރު ބޭއްވި ހާއްސަ ރަސްމިއްޔާތު ޝަރަފްވެރިކޮށްދެއްވީ، ރާއްޖޭގެ ފަތުރުވެރި ކަމާއިބެހޭ ވަޒީރު ޑރ. ޢަބްދުﷲ މައުސޫމެވެ.

މިރަސްމިއްޔާތުގައި އެމް.އެމް.ޕީ.އާރ.ސީގެ މެނޭޖިން ޑިރެކްޓަ ތައްޔިބު މުހައްމަދާއި، ނޯ ޕްލާސްޓިކް އަދި މޯލްޑިވިއާނާ ގްރޫޕް ބޯޑް މެންބަރުންނާއި، ވެމްކޯއިން ބައިވެރިއެވެ.

މިރަސްމިއްޔާތުގައި ވާހަކަފުޅު ދައްކަވަމުން ޝަރަފްވެރި މެހްމާން، ފަތުރުވެރި ކަމާއިބެހޭ ވަޒީރު ޑރ. ޢަބްދުﷲ މައުސޫމް ވިދާޅުވީ، ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ކުރިއަށް ގެންދިޔުމަށް ތިމަވެށި ހިމަޔާތްކޮށް ރައްކާތެރި ކަމާއިއެކު އަންނަން އޮތް ޖީލުތަކަށް ފޯރުކޮށްދޭންޖެހޭ ކަމަށެވެ. އަދި ރާއްޖޭގެ ނާޒުކު ތިމާވެއްޓަށް ކުރިމަތިވެފައިވާ ގިނަގުނަ ގޮންޖެހުންތަކުގެ ތެރޭގައި އެއްފަހަރު ބޭނުންކޮށްފައި އުކާލާ ޕްލާސްޓިކުން އުފެދޭ ކުނި ހިމެނޭއިރު، މިމައްސަލަ ހައްލުކުރުމަށް ނޯ ޕްލާސްޓިކުން ކުރާ މަސައްކަތްތައް ފާހަގަކުރެއްވިއެވެ. މޯލްޑިވިއާނާއާއި ގުޅިގެން ނޯ ޕްލާސްޓިކުން ފެށި މި މަސައްކަތާއިއެކު، އެއްފަހަރު ބޭނުންކޮށްފައި އުކާލާ ޕްލާސްޓިކް ރާއްޖެއިން ނައްތާލުމަށް ސަރުކާރުން ކުރާ މަސައްކަތައް އިތުރު އެހީތެރިކަމެއް ލިބިއްޖެކަމަށް ވަޒީރު ޑރ. މައުސޫމް ވިދާޅުވިއެވެ.

މިރަސްމިއްޔާތުގައި މޯލްޑިވިއާނާ ގްރޫޕްގެ ޗެއަރމަން އަދި ނޯ ޕްލާސްޓިކް މޯލްޑިވްސްގެ އިންޓަރނޭޝަނަލް އެގްޒެކްޓްޓިވް ޑިރެކްޓަރ އަރތަރ ލިޕޯވް ވަނީ، ރާއްޖޭގެ ތިމާވެއްޓަށް ފާއިތުވި 30 އަހަރު އައިސްފައިވާ ބަދަލުތަކަށް އަލިއަޅުވާލާ ވާހަކަ ދައްކާފައެވެ. އަރތަރ ވިދާޅުވީ، މީގެ 30 އަހަރު ކުރިން ރާއްޖޭގެ ކަނޑުއަޑީގެ ހަޤީޤީ ރީތިކަން ފެނުމުގެ ނަސީބު ލިބުނު ކަމަށާއި، ނަމަވެސް އެ ރީތިކަން އެކި ސަބަބުތަކާއި ހުރެ މިހާރު މަޑުމަޑުން ނެތެމުންދާ ކަމަށެވެ. އަދި ދުނިޔެ ހޫނުވުމާއި މޫސުމަށް އަންނަމުންދާ ބަދަލުތަކުގެ އިތުރުން އިންސާނުންގެ އަމިއްލަ އަތުން ފަރުތަކާއި، ވެށި ހަލާކުގެ ތެރެއަށް އެއްލާލާ މަންޒަރު ފެނުމަކީ ހިތާމަކުރާ ކަމެއް ކަމަށެވެ. ނޯ ޕްލާސްޓިކް މޯލްޑިވްސްއާއިއެކު ކުރާ މަސައްކަތުން ރާއްޖޭގެ ރީތިކަން އިއާދަ ކުރުމަށް ޖަމާޢީގޮތެއްްގައި ގިނަ މަސައްކަތްތަކެއް ކުރެވޭނެކަން ފާހަގަކުރައްވަމުން އަރތަރވަނީ، އެއްފަހަރާ ބޭނުންކޮށްފައި އުކާލާ ޕްލާސްޓިކް ބޭންކުރުމަށް ދިވެހި ސަރުކާރުން ކުރާ މަސައްކަތަށް ޝުކުރު އަދާކޮށްފައެވެ.

އެއް ފަހަރު ބޭނުންކޮށްފަ އުކާލާ ޕްލާސްޓިކް ކުނީގެ ސަބަބުން ތިމާވެއްޓާއި ނާޒުކު ފަރުތަކަށް އަދި އިންސާނުންގެ ސިއްހަތައް ކުރާ ނޭދެވޭ އަސަރުތަކާއި ގުޅޭގޮތުންވެސް މިރަސްމިއްޔާތުގައި އަލިއަޅުވާލާފައިވެއެވެ. ނޯ ޕްލާސްޓިކް މޯލްޑިވްސްގެ އިންޓަރނޭޝަނަލް މީޑިއާ ޑިރެކްޓަރ އަނަސްޓޭޝިއާ ސްޓޭސީ ދިން ޕްރެޒެންޓޭޝަނުގައިވަނީ، ރާއްޖޭގެ ކުނީގެ ހާލަތާއި އަދި އެހާލަތު ބަދަލު ކުރުމަށް ކުރިއަށް އޮތް ދުވަސްތަކުގައި ނޯ ޕްލާސްޓިކުން ކުރިއަށް ގެންދާނެ ހަރަކާތްތައް ހިއްސާކޮށްފައެވެ.

މިރަސްމިއްޔާތު ނިންމާލާފައިވަނީ ނޯ ޕްލާސްޓިކް މޯލްޑިވްސްއާއި މޯލްޑިވިއާނާ ގްރޫޕްގެ ގުޅުން ރަމުޒުކޮށްދޭ ދިދައެއް ރިޓްލެއްލާ ސަފާރީގައި ނެގުމާއި އެކުގައެވެ. މިދިދަ ނަންގަވައިދެއްވީ ފަތުރުވެރިކަމާއި ބެހޭ ވަޒީރު ޑރ. މައުސޫމް އަދި މޯލްޑިވިއާނާ ގްރޫޕްގެ މެންބަރުންނެވެ.

ނޯ ޕްލާސްޓިކް މޯލްޑިވްސް އަކީ 2019ވަނަ އަހަރު ރަޖިސްޓްރީކޮށްގެން ހިންގާ މަދަނީ ޖަމުއިއްޔާއެކެވެ. މިޖަމުއިއްޔާގެ މައިގަނޑު މަގްސަދަނީ އެއްފަހަރު ބޭނުންކޮށްފައިވާ އުކާލާ ޕްލާސްޓިކް ކުނި ރާއްޖޭގެ ވެށިން މަދުކޮށް ޕްލާސްޓިކަށް ނޫނެކޭ ބުމުމުގެ ސަޤާފަތެއް ޤާއިމްކޮށް ވެށީގެ ސާފުތާހިރުކަން ޤާއިމްކުރުމެވެ. 

މި މަގްސަދު ހާސިލްކުރުމަށް ފައިތުވި އަހަރުތަކުގައި ތަފާތު މަސައްކަތްތަކެއް ޖަމުއިއްޔާއިން އިސްނަގައިގެންވަނީ ކުރިއަށް ގެންގޮސްފައެވެ. އަދި ކުރިއަށް އޮތް ތަނުގައި ގިނަ މަޝްރޫޢުތަކެއް ކުރިއަށް ގެންދިޔުމަށް ޖަމުއިއްޔާއިން ވަނީ ރާވާފައެވެ. މިގޮތުން މޯލްޑިވިއާނާ ގްރޫޕާއިއެކު މި ގާއިމްކުރި ގުޅުމަކީ ޖަމުއިއްޔާގެ ހިންގުން ހަރުދަނާކޮށް ގިނަ އަދި ބޮޑު މަޝްރުޢޫތައް މިދާއިރާއިން ކުރިއަށް ގެންދިޔުުމެވެ.

100%
ކަމުގޮސްފި
0%
އަޑުއެހިތާ މިހުރީ
0%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް