މި ތަފާސް ހިސާބުތައް ހިއްސާކޮށްފައިވަނީ، ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގަައި ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން އެ އޮފީހުގެ ތަރުޖަމާން މުހައްމަދު މިއުވާން އެވެ.
މިއުވާން ހިއްސާކުރި ތަފާސް ހިސާބުތަކުގައި ވާގޮތުން، ޔާމީންގެ ފަސް އަހަރުގެ ދައުރުގައި 30 އަށްވުރެ ގިނަ ގައުމަށް ވަޑައިގެންއިރު، އެންމެ ގިނަ ދަތުރުފުޅުތައް ކުރައްވާފައިވަނީ، ސިންގަޕޫރަށެވެ. އެގޮތުން ސިންގަޕޫރަށް ނުވަ ދަތުރުފުޅު ކުރައްވާފައިވެއެވެ.
ރައީސް ޔާމީންގެ ވެރިކަމުގައި ކުރެއްވި ދަތުރުފުޅުތައް
ސިންގަޕޫރަށް ގިނަ ދަތުރުތަކެއް ކުރައްވާފައިވާއިރު، އެމްއެމްޕީއާރުސީ ފައިސާގެ ބޮޑުބައެއް ހުރީ ސިންގަޕޫރުގެ ބޭންކެއްގައި ކަމަށް އަދީބު ވިދާޅުވެފައިވާކަމަށް އެންމެފަހުން ރައީސް ޔާމީން ބޭއްވެވި ނޫސްވެރިންގެ ބައްދަލުވުމުގައި ވަނީ ވިދާޅުވެފަ އެވެ.
އެދުވަހު ރައީސް ޔާމީން ވިދާޅުވީ، އެމައުލޫމާތު އެމަނިކުފާނާއި ހިއްސާކުރެއްވީ، ޖަލުގައި އަދީބު ހުންނަވަނިކޮށް، އެމަނިކުފާނުގެ ވެރިކަމުގައި ހުންނެވި ދުވަސްވަރު އޭރު އެންޓި ކޮރަޕްޝަން ކޮމިޝަން (އޭސީސީ) ގެ ރައީސް ހަސަން ލުތުފީ ކަމަށެވެ.
އެ ފައިސާތައް ހުރީ ސިންގަޕޫރުގެ ބޭންކެއްގެ ޕޯސްޓް ބޮކްސް އެއް ތެރޭ ކަމަށާއި، އެފައިސާ ނެގޭނީ އަދީބުގެ ލޮލުގެ ރެޓީނާ ސްކޭނެއް ކޮށްގެން ކަމަށްވާތީ އެގައުމަށް ފޮނުވާދިނުމަށް އަދީބު އެދޭކަމަށް ލަތީފު ވިދާޅުވި ކަމަށް ޔާމީން އެދުވަހު ވިދާޅުވި އެވެ.
މިއަދު މިއުވާން ވިދާޅުވީ، ރައީސް ޔާމީން ސިންގަޕޫރަށް ދަތުރުތައް ކުރައްވާފައިވަނީ، 2013 އާއި 2014 އާއި ދެމެދުގައި ކަމަށް ރިކޯޑުތަކުން ދައްކާ ކަމަށެވެ.
