އެލްޖީއޭއިން ފަންބޮނޑިއަށް މަގު ކޮނުމުގެ ހުއްދަ ތަފާތު ކުރުމެއް ނެތި ދިނުމަށް އަންގާފައި ވަނިކޮށް، ޕީޕީއެމްގެ 5 މެމްބަރުން ތިއްބަވާ ފޮނަދޫ ކައުންސިލް ރައީސް އަހުމަދު ރިޔާޒު ސޮއިކޮށް ފަންބޮނޑިއަށް ފޮނަދޫ ކައުންސިލުން ފޮނުވާފައި ސިޓީގައި ބުނެފައި ވަނީ އެކުންފުނިން އެދިފައިވާ މަގު ކޮނުމުގެ ހުއްދަ ދެވެން ނެތް ކަމަށެވެ. ފޮނަދޫ ކައުންސިލުން މަގާމް ނުފޫޒު ނަހަމަ ގޮތުގައި ބޭނުންކުރަމުންދާ މައްސަލަ މިހާރު ދަނީ އޭސީސީއިން ވެސް ތަހްގީގު ކުރަމުންނެވެ.
މިމައްސަލައިގައި ފަންބޮނޑިން ފޮނަދޫ ކައުންސިލަށް ފޮނުވާފައިވާ ސިޓީގައި ބުނެފައި ވަނީ އެކުންފުނިން މަގު ކޮނުމުގެ ހުއްދައަށް އެދުނު ފަހުން ހުއްދައަށް އެދިފައިވާ ފަރާތްތަކަށްވެސް ހުއްދަ ދީފައިވާ ކަމަށާއި އެހެން ހުރިހާ ފަރާތްތަކަށް ދޭ މަގު ކޮނުމުގެ ހުއްދަ އެކުންޏަށް ނުދޭ ސަބަބެއް ބަޔާންކޮށްދިނުމަށެވެ.
ރާއްޖޭގައި އެންމެ ފުރަތަމަ ފައިބަ އޯޕަން އެކްސެސް ނެޓްވޯކެއް ގާއިމް ކުރި ފަންބޮނޑި މޯލްޑިވްސް އަށް މިމައްސަލައިގައި ލ. އަތޮޅު ކައުންސިލުން ވެސް ބުނެފައި ވަނީ ފޮނަދޫ ކައުންސިލުން ފަންބޮނޑިއަށް ހުއްދަ ނުދީ ހިފަހައްޓާފައި ވަނީ އުސޫލެއް ހަމައެއްނެތި ގަވައިދާ ހިލާފަށް ކަމަށެވެ. ފައިބަރ އޯޕަން އެކްސަސް ނެޓްވޯކް އަކީ ޒަމާނީ ޓެކްނޮލޮޖީއަށް ވާސިލްވުމަށް ދުނިޔޭގެ ކުރިއަރާފައިވާ ގިނަ ގައުމުތަކުގައި ބޭނުން ކުރާ އިންފްރާސްޓަކްޗަރ ނިޒާމް އެކެވެ. މިއީ އެންމެ ކަނެޓްޝަނަކުން އެތަކެއް ޓެކްނޮލޮޖީގެ ހިދުމަތްތަކެއް ލިބިދޭ ގޮތަށް ފަރުމާކޮށްފައިވާ އިންފްރާސްޓަކްޗަރ ނިޒާމެކެވެ.
