ޔުޓިލިޓީ ރެގިލޭޓަރީ އޮތޯރިޓީން ބުނި ގޮތުގައި އިމާރާތްކުރުމާއި ސިނާއީ އެހެނިހެން މަޝްރޫތަކަށް ބިމުން ފެންނަގައި ފެން ބޭރުކުރުމުގެ ޤަވާއިދަށް ގެނެވުނު ފުރަތަމަ އިޞްލާހު ގައިވާގޮތުން، އެ އޮތޯރިޓީގެ ހުއްދައާއި ނުލައި ބިމުން ފެންނަގައި ފެންބޭރުކުރާ ކޮންމެ ދުވަހަކަށް 40،000 ރުފިޔާ އިން ޖޫރިމަނާކުރެވޭނެއެވެ. އަދި ހުއްދައާއި ނުލައި ނުވަތަ ހުއްދައިގެ މުއްދަތު ހަމަވެފައިވަނިކޮށް ބިމުން ފެންނަގައި ފެން ބޭރުކުރުމުގެ މަސައްކަތް ކުރިއަށް ގެންގޮސްފައިވާނަމަ، ހުއްދަ ދެވޭނީ ނުވަތަ ހުއްދައިގެ މުއްދަތު އިތުރުކުރެވޭނީ ހުއްދައާއި ނުލައި މަސައްކަތްކޮށްފައިވާ މުއްދަތަށްވާ ޖޫރިމަނާގެ ޖުމްލަ ފައިސާ އެ އިދާރާއަށް ދެއްކުމުން ކަމަށް އެ އޮތީރިޓީން ބުންޏެވެ.
ޔުޓިލިޓީ ރެގިލޭޓަރީ އޮތޯރިޓީން ބުނީ ގަވާއިދުގައި ބަޔާންކުރާގޮތުން ބިމުން ފެންނަގައި ފެން ބޭރުކުރުން ކަމަށް ބެލެވޭނީ ޕަންޕެއްގެ އެހީގައި ބިމުން ފެންނެގުމަށެވެ. އެ ފެން ނަގައި އަޅަމުންދަނީ އިމާރާތްކުރާ ސަރަހައްދުގެ ތެރެއަށް ކަމުގައިވީނަމަވެސް ބެލެވޭނީ ބިމުން ފެންނަގައި ފެން ބޭރުކުރާ ކަމުގައި ޔުޓިލިޓީ ރެގިލޭޓަރީ އޮތޯރިޓީން ދެކެއެވެ.
ގާނޫނުގައިވާ ގޮތުން، އެ އޮތޯރިޓީގެ ހުއްދަނެތި ބިމުން ފެންނަގައި ފެން ބޭރުކުރުމާއި އެކަމަށް އެހީތެރިވުމަކީ މަނާކަމެކެވެ. މިގޮތުން މި އޮތޯރިޓީގެ ހުއްދަޔާނުލައި ބިމުން ފެންނަގައި ފެން ބޭރުކުރާ ފަރާތަކަށް އެކަންކުރުމަށް މަގުމަތީ ހޮޅިއެޅުމުގެ ހުއްދަޔާއި، ބިމުން ފެންނަގައި ފެން ބޭރުކުރާއިރު އެފެން ބޭރުކުރުމަށް ރަށުގެ ސަރަހައްދެއް ކަނޑައަޅައި އެތަނަކަށް ފެންބޭރުކުރުމުގެ ހުއްދަދޭ ފަރާތެއް ބެލެވޭނީ ބިމުން ފެންނަގައި ފެން ބޭރުކުރުމުގެ މަސައްކަތައް އެހީތެރިވާ ފަރާތެއްގެ ގޮތުގައެވެ.
