މިއަދު އެ ކުންފުނިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޝާހިދު ވިދާޅުވީ، މިހާތަނަށް ބެލި ބެލުމުން އެމްޕީއެލްގެ ތެލުގެ ވައްކަން 2018 ވަނަ އަހަރުން ފެށިގެން ކުރަމުން އައިކަން ފާހަގަ ކުރެވިފައި ވާކަމަށާއި، 2018 އާއި 2019 އަދި 2020 ވަނަ އަހަރު ވީ ގެއްލުން ބަލަމުން އަންނަ ކަމަށެވެ.

މީގެ އިތުރުން ޝާހިދު ވިދާޅުވީ މި ވައްކަމުގައި ބައިވެރިވި މީހުން ހޯދުމަށް އެކުންފުނިން މަސައްކަތް ކުރިކަމަށާއި، އެގޮތުން އިންޓާނަލް އޮޑިޓަކާއި އެންޓި ކޮރަޕްޝަން ކޮމިޝަން (އޭސީސީ) އަަށާއި ފުލުހުންނަށް ވެސް އެ މައްސަލަ އޭރު ހުށަހެޅި ކަމަށެވެ. އަދި އެ މައްސަލައިގައި ޝާމިލުވާ މުވައްޒަފުން މިހާރު ވަޒީފާ އިން ވަކިކޮށް، ފުލުހުންގެ ތަހުގީގު ވެސް ހިންގަމުން އަންނަ ކަމަށް ޝާހިދު ވިދާޅުވި އެވެ. 

ނޫސްވެރިންގެ ބައްދަލުވުމުގައި ވާހަކަ ދައްކަމުން ޝާހިދު އިތުރަށް ވިދާޅުވީ، މި މައްސަލަ އާއި ގުޅިގެން އޮޑިޓާ ޖެނެރަލްގެ އޮފީހުން ކުރިއަށް ގެންދާ ތަހުގީގު ރިޕޯޓް ވަރަށް އަވަހަށް އާއްމުވާނެ ކަމަށާއި، އަދި މި މައްސަލަ އާއި ގުޅިގެން ފުލުހުން ކުރިއަށް ގެންދާ ތަހުގީގަށް ދެވެން ހުރި ހުރިހާ އެއްބާރުލުމެއް ދެމުން އަންނަ ކަމަށެވެ. 

އަދި ލަސްތަކެއް ނުވެ މި މައްސަލަ ކޯޓަށް ހުށަހެޅިގެން ދާނެ ކަމަށް ބެލެވޭ ކަމަށް ޝާހިދު ވިދާޅުވި އެވެ. 

ޝާހިދުގެ ވާހަކަފުޅުގައި އިތުރަށް ވިދާޅުވީ، މި ވައްކަމުގައި އުޅުނީ އެއް ބައެއް ކަމަށާއި، މިހާރު އެ މީހުން އެމްޕީއެލްގެ ވަޒީފާތަކުން ވަކިކޮށްފައި ވާކަމަށެވެ. 

އެމްޕީއެލް އަށް ބޭނުންވާ ތެޔޮ ހޯދުމުގައި ހިންގާފައިވާ އަށް މިލިއަން ރުފިޔާގެ ވައްކަން ފަޅާއެރީ، ކޮވިޑް-19 އާ ގުޅިގެން ކުންފުނީގެ އޮޕަރޭޝަންތައް މަދުވެފައި އޮއްވައި، އާއްމު މަސްތަކަށް ވުރެ ތިން މަހުގެ ހަރަދު ބޮޑުވެފައިވާ ކަން ރިޕޯޓުން ފެންނަން އޮތުމުންނެވެ.