ޑެންގޫ ހުން ޖެހި، ހާލު ސީރިއަސްވެގެން އައިޖީއެމްއެޗް އަށް ގެނައި ކުއްޖަކު މިއަދު ހެނދުނު ނިޔާވެފައިވާ ކަން އެ ހޮސްޕިޓަލުން ”ސީއެންއެމް“ އަށް ވަނީ ކަށަވަރުކޮށްދީފަ އެވެ.
އައިޖީއެމްއެޗުން ބުނީ، އެކުއްޖާ ނިޔާވީ، އައިސީޔޫގައި ފަރުވާދެމުންދަނިކޮށް ކަމަށެވެ. އެ ކުއްޖާ އައިޖީއެމްއެޗަށް ގެނެސްފައިވަނީ، ލޭ އަންނާތީ އެވެ.
އައިޖީއެމްއެޗްގެ ކުޑަކުދިންގެ ހާއްސަ ޑޮކްޓަރު އަހުމަދު ފައިސަލް ވިދާޅުވެފައިވާގޮތުން، މިދިޔަ ސެޕްޓެމްބަރު މަހުގެ 29 ވަނަ ދުވަހު އެޑްމިޓުކުރި ތިން ކުޑަކުއްޖަކުވެސް އެޑިމިޓުކޮށްފައިވަނީ ޑެންގޫ ޖެހިގެން ނެވެ.
އޭގެތެރެއިންްއެއް ކުއްޖަކު އައީ ޑެންގޫހުންޖެހި، ހުންމަޑުވެ ދެވަނަ ވަނަދުވަހު ހޮޑުލީއިރު ލެޔާއިއެކު ހޮޑުލުވިގެން ކަމަށް ޑރ. ފައިސަލް ވިދާޅުވި އެވެ.
ޑރ. ފައިސަލް މިއަދު އޭނާގެ ސޯޝަލް މީޑިއާގައި ކުރެއްވި ޕޯސްޓެއްގައިވެސް ވަނީ ޑެންގޫހުން ޖެހުމުން ސަމާލުކަން ދޭންވީ ކަންކަން ފާހަގަކޮށްފައެވެ.
އެގޮތުން ސަމާލުކަން ދޭންވީ ކަންކަން
- ގިނައިން އަރާމުކުރުން
- ގިނައިން ދިޔާ ތަަކެތި ބޭނުންކުރުން، ޑރ. ފައިސަލް ވިދާޅުވިގޮތުން ފެނަށްވުރެ ރަނގަޅީ ލޮނުޕެކެޓް، ކުރުބާ ފެން ޖޫސްފަދަ ތަކެތި ބޭނުން ކުރުމެވެ.
- ކޮފީ އާއި ކެފެއިން ހުންނަ ތަކެތި ބޭނުންނުކުރުން
- ހޮޑުލެވޭނަމަ ކަރާފަނިފަދަ ރަތްކޮށް ހުންނަ ނުވަތަ މައިލޯ ފަދަ ކުލަގަދަ ތަކެތި ނުބުއިން
- ޕެރެސެޓުމޯލް ނުވަތަ އެހެންވެސް ބޭހެއް ހުމަށް ނުވަތަ ގައިގައި ރިއްސުމަށް ބޭނުން ނުކުރުން
ޑެންގޫހުމުގެ އަލާމާތްތައް
- ހުންމަޑުވާއިރުވެސް ބަލިހާލަތު ބޮޑުވުން
- ހޭވެރިކަން ނެތުން
- ކުޑަކުދިން މާގިނައިން ރުއިން
- ހަށިގަނޑުގެ އެއްވެސް ތަނަކުން ލޭ އައުން
- ބޮޑުކަމުދާއިރު ނަޖިސް ރަތްކުލައިގައި ނުވަތަ ކަޅުކުލައިގައި ހުރުން
- ރަތްކުލައިގެ ބިހިތަކެއް ނެގުން
- އަތްފައި ފިނިވުން
- ބަނޑުގައި ރިއްސުން
- ހޮޑުލެވި ދިޔާ އެއްޗެހި ނުބޮވުން
- ހަ ގަޑިއިރުވާއިރުވެސް ކުޑަކަމު ނުދެވުން
