މީގެ އިރުކޮޅެއް ކުރިން އޮޑިޓަ ޖެނެރަލް އާއްމު ކުރެއްވި "އެމްޕީއެލްގެ އޮޕަރޭޝަންތަކަށް ބޭނުންވާ ޑީސަލް ގަތުމުގެ މުއާމަލާތްތަކާ ގުޅޭ ހާއްސަ އޮޑިޓް ރިޕޯޓު"ގައި 2018 ވަނަ އަހަރުން ފެށިގެން 2020 ވަނަ އަހަރަށް ހިންގާފައިވާ ހިޔާނާތްތައް ތަފްސީލްކޮށް ކިޔައިދެއްވާފައިވެއެވެ. 

އޮޑިޓް ރިޕޯޓުގައިވާ ގޮތުން އެމްޕީއެލްގެ ހިޔާނާތުގެ ތެރެއިން 28 މިލިއަން ރުފިޔާވަނީ ގެއްލިފައެވެ. 

އޮޑިޓް ރިޕޯޓުގައި ފާހަގަކޮށްފައިވާ ކަންކަމާ ގުޅޭ ގޮތުން އެމްޕީއެލްގެ އެމްޑީ ޝާހިދުއަލީވަނީ މި ހަފްތާގައި ވާަހަކަ ދައްކަވާފައެވެ. 

އެމްޕީއެލް އަށް ތެޔޮ ހޯދުމުގައި ހިނގާފައިވާ ވައްކަން ހީކުރިވަރަށް ވުރެ ބޮޑު ކަމަށާއި، އެ ވައްކަން 2018 ވަނަ އަހަރުން ފެށިގެން ހިނގާފައި ވާކަމަށް، ކުންފުނީގެ މެނޭޖިން ޑިރެކްޓަރު ޝާހިދު އަލީވަނީ ވިދާޅުވެފައެވެ. 

އެމްޕީއެލް އަށް ބޭނުންވާ ތެޔޮ ހޯދުމުގައި ހިންގާފައިވާ އަށް މިލިއަން ރުފިޔާގެ ވައްކަން ފަޅާއެރީ، ކޮވިޑް-19 އާ ގުޅިގެން ކުންފުނީގެ އޮޕަރޭޝަންތައް މަދުވެފައި އޮއްވައި، އާއްމު މަސްތަކަށް ވުރެ ތިން މަހުގެ ހަރަދު ބޮޑުވެފައިވާ ކަން ރިޕޯޓުން ފެންނަން އޮތުމުންނެވެ.