މިހާރު ފުލުހުން ބާއްވަމުންދާ ނޫސްވެރިންގެ ބައްދަލުވުމުގައި ފުލުހުން ބުނީ، ޝާހިލުގެ ފަރާތުން ފުލުހުން ބޭނުންވާ މުހިންމު މައުލޫމާތުތައް ދޭން ދެކޮޅު ހަދާ ކަމަށާއި އެވާހަކަތައް ދައްކަންވެސް އޭނާ ބޭނުން ނުވާ ކަމަށެވެ.
އަދި އެމައްސަލާގައި އެންމެ ފުރަތަމަ ޕާސްޕޯޓު ދިނުމަށްވެސް އޭނާ އިންކާރުކުރި ކަމަށާއި، ތަހުގީގަށް ކިރިޔާވެސް އެއްބާރުލުމެއް ދޭން ފެށީ މިދިޔަ ހަފްތާގެ ތެރޭގައި ކަމަށެވެ.
ޝާހިލް ކުށަށް އިއުތިރާފު ނުވިނަމަވެސް އަދި ބައެއް މައުލޫމާތު ފޯރުކޮށްދޭން ދެކޮޅު ހެދިނަމަވެސް ގަސްތުގައި މީހަކު މަރާލިކަން ސާބިތުކުރެވި ދައުވާ ކުރެވޭ ވަރަށް އޭނާއާއި ދެކޮޅަށް ހެކި ލިބިފައިވާ ކަމަށް ފުލުހުން ބުންޏެވެ.
މިހާރު ކުރަމުންދަނީ އޭނާގެ ފޯނު ތަހުލީލުކުރުމުގެ މަސައްކަތްކަން ފާހަގަކޮށް ފުލުހުން ބުނީ ފުރަތަމަ ފޯނުގެ ޕާސްވޯޑު ދޭންވެސް އޭނާ ދެކޮޅު ހެދި ކަމަށެވެ. ނަމަވެސް ފަހުން އެކަމަށް އެއްބާރުލުންދީ އެ ފޯނު ހުޅުވި ތަހުގީގުތައް ކުރެވެމުންދާ ކަމަށް ފުލުހުން މިއަދު ބުންޏެވެ.
ޝާހިލުގެ ނަފްސާނީ މައްސަލަތަކެއް ހުރިކަމަށް ދެކެވޭ ވާހަކަތަކާއި ގުޅިގެން ފުލުހުން ބުނީ އޭނާގެ ނަފްސާނީ އެއްވެސް މައްސަލައެއް ހުރިކަން މިހާތަނަށް ހެދުނު ޓެސްޓުތަކުން ފާހަގަކުރެވިފައި ނުވާ ކަމަށެވެ.
