ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި އަޒްހާންގެ މަރާއި ގުޅޭ އެންމެ ފަހުގެ މައުލޫމާތުތައް ހިއްސާކުރަމުން ފުލުހުން ބުނީ، އެ ސަރަހައްދުން ފެނުނު އަޒްހާންގެ ހަށިގަނޑު ކަމަށް ބުނެ ބަޔަކު ލިންކެއް މެދުވެރިކޮށް ފޭކް ފޮޓޯތަކެއް ދައުރުކުރަމުންދާ ކަމަށެވެ.
އެގޮތުން އެފަދަ ދެ ފޮޓޯއެއް އެމީހުން ދައުރުކުރަމުންދާ ކަމަށާއި، އެ ފޮޓޯތައް ބަލާލުމުން އަޒްހާންގެ ހަށިގަނޑު ކައިރިން ދުއް ފުލުހުންގެ ހައިސިއްޔަތުން އެއީ އަޒްހާންގެ ހަށިގަނޑުގެ ފޮޓޯ ނޫންކަން ސާފުކޮށް ބުނަން އެނގޭކަމަށް ފުލުހުން ބުންޏެވެ. ނަމަވެސް އަޒްހާންގެ ހަށިގަނޑު ނުފެންނަ އާންމު ރައްޔިތުން އެ ފޮޓޯތައް ބަލާލަން ޝައުގުވެރިކަން ހުރެގެން އެ ލިންކަށް ވަންނަމުންދާ ކަން ފާހަގަކުރެވިފައިވާ ކަމަށް ފުލުހުން ބުންޏެވެ.
ފުލުހުން މިއަދު ވަނީ، އެއީ އަޒްހާންގެ ފޮޓޯތައް ނޫންކަން ކަށަވަރުކޮށްދީ އެފަދަ ސްކޭމްތަކަށް ސަމާލުވުމަށް އިލްތިމާސްކޮށްފަ އެވެ.
ގެއްލިގެން ހޯދާތާ ދެ ހަފްތާފަހުން ހުޅުމާލެއިން ހަލާކުވެފައި އޮއްވާ ފެނުނު އަޒްހާންގެ ހަށިގަނޑު ކަމަށް ބުނެ ބަޔަކު ފޭކް ފޮޓޯތަކެއް ދައުރު ކުރަމުންދާއިރު، މަރުވެފައިވާ މީހަކާއި ގުޅުވައި ކުރާ މިފަދަ ނާތަހުޒީބު އަމަލުތަކަށް ސަމާލުވާން ފުލުހުން މިއަދު އިލްތިމާސްކުރި ނަމަވެސް މިފަދަ އަމަލުތައް ކުރާ ފަރާތްތަކުން ހޯދައި ފިޔަވަޅު އަޅާނެކަން ނުވަތަ ނޫންކަން ވެސް ފުލުހުން މިއަދު ފާހަގަކޮށްފައެއް ނުވެއެވެ.
