ފުލުހުން ބުނީ، އެ އަންހެންމީހާއަކީ މަސްތުވާތަކެތީގެ މައްސަލައެއްގައި ފިރިހެނަކު ހައްޔަރުކުރުމުން އެކަމާއި ހިތްހަމަ ނުޖެހުން ފާޅުކޮށް ފުލުހުންގެ އިދާރާގައި ހަމަނުޖެހުން ހިންގި މީހެއް ކަމަށެވެ.

މައުލޫމާތެއް ސާފުކުރަން ދިޔަ އަންހެނަކަށް އައްޑޫ ސިޓީ ޕޮލިސް ސްޓޭޝަންތެރޭ އަނިޔާކުރި ކަމަށް ބުނެ ސޯޝަލް މީޑިއާގައި ދައުރުވާ ވީޑިއޯ އާއި ގުޅިގެން ފުލުހުން ދާދި ދެންމެއަކު ނެރުނު ބަޔާނެއްގައި ބުނީ، އޭނާއަށް ފުލުހުން އަނިޔާކޮށްފައިވާ ކަމަށް ބުނާ ވާހަކައަކީ ހަގީގަތެއް ނޫން ކަމަށެވެ. 

ފުލުހުން ނެރެފައިވާ ބަޔާނުގައިވާގޮތުން، އައްޑޫ ސިޓީގައި ޖަމާއަތް ހަދައިގެން ކުއްކުރާ ފަރާތްތަކަށް އަމާޒުކޮށް ފުލުހުން ކުރިއަށް ގެންދާ އޮޕަރޭޝަންގައި މިމަހުގެ 14 ވަނަ ދުވަހުގެ ރޭ ސ. ހުޅުމީދޫގައި ޕެޓްރޯލް ކުރަމުންދިޔައިރު، 37 އަހަރުގެ ފިރިހެނެއްގެ ހަރަކާތްތައް ހުރިގޮތުން މަސްތުގެ ހާލަތުގައި ހުރިކަމަށް ޝައްކުކުރެވިގެން އޭނާ ހުއްޓުވައި ސުވާލުކޮށްފައިވާ ކަމަށެވެ.

ބަޔާނުގައި ބުނީ، ވީޑިއޯއިން ފެންނަ އަންހެނަކު ސްޓޭޝަނުން ނެރޭ މަންޒަރަކީ، އެ އަމަލު ހުއްޓާލައި ޕޮލިސް ސްޓޭޝަނުން ނިކުތުމަށް އެންގުމުންވެސް އެކަމަށް އިންކާރުކޮށްފައިވާތީ ފުލުހުންނަށް ގާނޫނޫން ލިބިދޭ ބާރުގެ ދަށުން އެމީހުން ނެރުމަށް މަސައްކަތްކުރަމުންދާތަން ކަމަށެވެ.

ވީޑިއޯއިން ފެންނަގޮތުން އެ އަންހެންމީހާ ނެރެން މަސައްކަތްކުރުމުންދިޔަ އަންހެން ފުލުހުންގެ ގައިގާ އަންހެންމީހާ ކޮޅުފައިން ޖަހައެވެ. ފުލުހުން މިރޭ ނެރުނު ބަޔާނުގައި ބުނީ އެމީހުން ނެރެން މަސައްކަތްކުރުމުން ފުލުހުންގެ ގަޔަށް އަތްލާ ހާދާފައިވާއިރު، އެ ފުލުހުންނަށް އެކިވަރުގެ އަނިޔާތައްވެސް ލިބިފައިވާ ކަމަށެވެ.

ފުލުހުންގެ ވާޖިބަށް ހުރަސް އަޅައި ފުލުހުންގެ ގަޔަށް އަތްލައި ހަަމަނުޖެހުން ހިންގާފައިވާތީ އެމައްސަލަ ބަލަމުންދާ ކަމަށާއި، އެކަމުގައި ފުލުހުން އަމަލުކޮށްފައިވާގޮތް ބަލައި އެކަން ބަލަމުންދާ ކަމަށް ބަޔާނުގައި ވެއެވެ.

އައްޑޫ ސިޓީގައި މަސްތުވާތަކެތީގެ މައްސަލައާއި ގޭންގު ހަދައިގެން މީހުން މެރުންފަދަ ބޮޑެތި ކުށްތައް ކުރުން އާއްމުވެފައިވާތީ ފުލުހުންދަނީ އެކަން ހުއްޓުވުމުގެ ގޮތުން އެ ސިޓީގައި ހާއްސަ އޮޕަރޭޝަންތަކެއް ހިންގަމުން ނެވެ.